Wanda Nara ka folur gjatë e gjërë për “Corriere della Sera” në lidhje me çështjen Icardi, teksa u ndal sigurisht te momenti më deçiziv i sezonit, kur sulmuesit argjentinas i hoqën shiritin e kapitenit dhe vendosi të mos udhëtonte drejt Vjenës, për sfidën e Europa League.
“Nuk është se refuzoi të shkonte të luante. Po luante me dhimbje në gju dhe kishte shkuar tre herë në Barcelonë për t’u kuruar. Interi dinte gjithçka, ishte njoftuar! Kur i hoqën shiritin, ai më tha: “për të luajtur nuk duhet vetëm trupi, por sidomos shpirti! Dhe, për momentin, shpirtin e kam të copëtuar…” Kur të gjithë ishin duke e sharë Mauron dhe po e sulmonin, Moratti doli me një deklaratë për ta mbrojtur, sepse është një njeri i madh Massimo. Fjalët e tij ishin oksigjen kur po mbytesha”.
“Nuk i di llogaritë e klubit apo si funksionon fair play financiar. Ndoshta, në merkato mund të shitej vetëm Icardi!”.
“Raportet e tensionuara me Brozovic dhe Perisic? E keni gabim! Gjithmonë raporte normale. Madje, njërin e kemi komshi… Deklaratat e mia për Tiki Taka? Interi i dinte, nuk ishte nevoja që të më jepnin leje të flisja. Nuk e di pse më shohin si një femër që prish punë, por unë bëj rolin e agjentes dhe frazat seksuale nuk dua t’i dëgjoj aspak! Të gjithë janë sjellë mirë dhe më kanë pritur, edhe te Parisi. Paratici? Raport pune dhe tepër kordial!”
Por, pse Icardi hodhi në gjyq Interin? “Absolutisht jo për para, vetëm injorantët e besojnë! Nëse do të ishte për para, do të ishim larguar 3-4 vite më parë, kur Interi nuk luante Champions, ai qëndroi për dashurinë ndaj klubit. Donte vetëm të stërvitej si të gjithë të tjerët”.
“Icardi ishte kapiten i Interit, nuk do të kishte shkuar kurrë te Juventusi! Vendimet e Marottas për të ndryshuar strategji? Nuk e di, futbolli është biznes dhe ai merrret me llogaritë. Të shohim se kush ka pasur të drejtë, koha do të flasë. Kishim 15 oferta për Icardin, ia kam dhënë edhe Marottas. Nëse mbërritëm deri ditën e fundit të merkatos nuk është se jemi budallenj, por sepse e dimë vlerën e Icardit!”.