Johann David Wadephul, zv. kryetar i Grupimit Parlamentar të CDU/CSU, do të tentojë të ulë mazhorancën dhe opozitën në tryezën e dialogut për gjetjen e një zgjidhjeje për krizën politike në vend.
E ndërsa palët politike duken shumë larg njëra-tjetrës, presioni ndërkombëtar për zgjidhjen e krizës në Shqipëri po shtohet.
Pas Drejtorit të ri të Zyrës së Evropës Qendrore Jugore në Departamentin e Shtetit, David Kostelancik, i cili vizitoi Tiranën dhe zhvilloi takime me kreun e PD-së, Lulzim Basha, kryetaren e LSI-së Monika Kryemadhi, Kryeparlamentarin Gramoz Ruçi dhe Kryeministrin Edi Rama, në Shqipëri zbarkon Wadephul, i cili do të takohet me drejtuesit më të lartë politik për të bindur palët në gjetjen e një zgjidhjeje.
Vizita e deputetit gjerman pritet të realizohet brenda javës së ardhshme, ndërsa pas tij Tiranën do e vizitojë Roberto Montella, sekretar i Përgjithshem i Asamblesë Parlamentare të OSBE.
Johann David Wadephul i sugjeroi mazhorancës, para 30 qershorit, që të shikonte mundësinë e shtyrjes së zgjedhjeve lokale, këshillë kjo që u mor parasysh nga Presidenti Ilir Meta që anuloi me një dekret të posaçëm mbajtjen e zgjedhjeve në këtë datë, duke dekretuar zhvillimin e tyre më 13 tetor.
Por, mazhoranca qeverisëse e drejtuar nga Edi Rama shpërfilli kërkesën e ardhur nga Gjermania dhe zhvilloi një proces, që nuk kaloi klasën edhe nga vëzhguesit e OSBE/ODIHR.
“Shqipëria e gjen veten në një krizë të rrezikshme politike. Kjo është e keqe për perspektivën e vendit në Bashkimin Evropian. Prandaj, është detyrë e të gjitha partive pro-evropiane në qeveri dhe opozitë, që të afrohen njëra me tjetrën dhe të jenë të përgatitur për të bërë kompromise reale.
Nëse të dyja palët nuk janë të gatshme ta bëjnë këtë, ata vënë në pikëpyetje perspektivën e vendit të tyre për në Bashkimin Evropian. Dhe në të njëjtën kohë ata vetëm do të forcojnë ato forca që duan të nxisin nacionalizmin dhe të ndjekin planet për Shqipërinë e Madhe. Për më tepër, kjo do të nxiste vetëm vendet e treta për të ndërhyrë edhe më shumë në çështjet shqiptare.
E gjithë kjo mund të çojë në konflikte të reja, trazira apo edhe shpërthime në Ballkan. Ta themi hapur: planet për një Shqipëri të Madhe do të çojnë në fundin e perspektivës së Shqipërisë në BE! Kjo është arsyeja pse qeveria dhe opozita kanë një përgjegjësi për të kapërcyer krizën menjëherë. Edhe nëse qeveria Rama ka shumicën në parlament, ajo duhet të jetë e përgatitur për të bërë kompromise reale. Ne jemi të përgatitur për të ndihmuar në kapërcimin e krizës, nëse të dyja palët kanë vullnetin për ta bërë këtë”, deklaronte deputetit i CDU/CSU, para 30 qershorit.
