Në raporti përfundimtar të OSBE/ODHIR për zgjedhjet e 30 Qershorit, i kushtohet vëmendje edhe funksionimit të mediave dhe mënyrës se si ato pasquruan situatën politike.
Në raport evidentohet se tregu i limituar i reklamave, ka bërë që pronarët t’i përdorin televizionet në favor të interesave të tyre të biznesit, ndërkohë që gazetarët janë vulnerabël ndaj presioneve dhe shpesh vetë-censurohen.
Raporti përmend edhe ligjin që mazhoranca po përpiqet të kalojë në Parlament, për masat administrative ndaj mediave online.
“Edhe pse amendimet nuk janë votuar ende në parlament, adoptimi i tyre në këtë formë do të kishte një ndikim drithërues mbi median”, evidenton raporti.
OSBE/ODHIR kritikon ashpër edhe ERTV.
“Aktivitetet zyrtare dhe ato të fushatës elektorale të kryeministrit Rama, u filmuan dhe transmetuan në mënyrë ekskluzive në kanalin televiziv në Facebook, ERTV, të cilat më pas televizionet e tjera mundeshin vetëm t’i ripublikonin.
Kjo praktikë e ndalimit të aksesit të medias në evente publike të organizuara nga zyrtarë të shtetit dhe partitë politike, nuk lejoi që qytetarët të merrnin informacion objektiv gjatë fushatës.
Gjithashtu ndaloi të drejtën themelore të mediave, për të marrë informacion dhe për të përmbushur funksionin si rojtar, me efektin e uljes së llogaridhënies së zyrtarëve shtetëror ndaj publikut”, vlerëson raporti.
Televizionet kryesore në vend, Top Channel dhe TV Klan, sipas raportit, mbuluan fushatën e PS me tone pozitive, madje për televizionin Top Channel thuhet se sëbashku me RTSH-në “shërbyen si platforma për të promovuar PS-në“.
“Televizionet më të ndjekura, Top Channel dhe TV Klan e mbuluan PS-në me tone përgjithësisht pozitive dhe neutrale, ndërsa PD-në, me tone neutrale dhe negative. Ndërsa, News24 e mbuloi PS-në me tone negative dhe neutrale dhe PD-në, me tone neutrale dhe pozitive. Vizion Plus mbuloi PD-në në mënyrë pozitive dhe PS në mënyrë më të balancuar.
Programet politike dhe të aktualitet në Top Channel, News24 dhe RTSH, gjithashtu reflektuan politikat editoriale të televizioneve. Top Channel dhe RTSH, shërbyen si platforma për të promovuar PS-në. Talk Show-t në News24, ishin kritike me partinë në pushtet. Megjithatë, Talk Show Opinion në TV Klan, pati një ndryshim nga politika editoriale e televizionit, duke shërbyer si një platformë kritike ndaj PS”, vlerëson raportin.
