Ish-deputetja e Partisë Demokratike, e ka cilësuar tërheqje vëmendjeje deklaratën e bërë nga Ministrja e Arsimit, Besa Shahini, se do të inspektojë shkollat në Shqipëri.
Sipas Vokshit, me këtë deklaratë Shahini kërkon të largojë vëmendjen nga dështimet e njëpasnjëshme në arsim të qeverisë shqiptare.
Më tej Vokshi thekson se Shahini para se të kërcënojë me kontrolle bën mirë tu kërkojë falje mësuesve.
Ja postimi i plotë i Vokshit:
Shahini që nuk din c’thotë e nuk din c’bën…
Kjo puna e inspektimeve në 240 shkolla, një jave para nisjes së vitit të ri shkollor, jo vetëm është e pamundur fizikisht por edhe shkon ndesh me standartet ndërkombëtare të inspektimit në arsim.
Inspektimet “fshehurazi” një javë para fillimit të shkollës nuk zgjidhin dot problemet e shumta që ka sot sistemi arsimor.
Ministrja Shahini kërkon të tërheqë vemendjen pas dështimeve të një pas njëshme të saj dhe paraardhëses së saj si:
– E ashtuquajtura reformë e shpërndarjes së teksteve;
– 3 lëndë në 6 orë,
– ushqimi në shkolla,
– policimi në komunitet,
– Pakti për Universitetin etj.
Në vend që t’u kërkojë falje mësuesve për trajtimin poshtërues që u bëhet, për shkeljen e kontratës kolektive, për mos rritjen e rrogave dhe dhënien e shpërblimeve, për kushtet mizerabël ku ata punojnë, për stresin e vazhdueshëm për mbajtjen e vendit të punës në një sistem ku aftësia dhe profesionalizmi nuk vlen…, i kërcënon ata me inspektime “të rastësishme”, një shpikje alla Shahini, që do përdoret për linçimin e atyre mësuesve profesionistë e të ndershëm që nuk kanë pranuar të bëhen palë në farsën e votimeve moniste të 30 qershorit.
Shahini me vetëdije të plotë antikombëtare dhe me kurajon e të paaftit, po çon gjithnjë më shumë në rrënim arsimin në Shqipëri.
