Kandidatja për Kushtetuese Zhaklina Peto do të kalojë në sitën e verifikimeve nga KED.
Këshilli i Emërimeve në Drejtësi ka zhvilluar këtë të mërkurë mbledhjen e radhës, ku ishte thirrur eksperti i cili iu përgjigj pyetjeve sqaruese të drejtuara nga kandidatja për në Gjykatën Kushtetuese Zhaklina Peto, si dhe pyetjeve të drejtuara ndaj tij, nga ana e anëtarëve të KED.
Pas përfundimit të seancës dëgjimore, këshilli vendosi të vijojë me procedurën e verifikimit të mëtejshëm të kandidates Zhaklina Peto, konfirmuan burime zyrtare.
Më herët, KED ndaloi nga gara për në Gjykatën Kushtetuese Peton, me pasi ILDKPKI konstatoi se “nuk ka bërë deklarim të saktë të pasurisë, ka mungesë dokumentacioni për të justifikuar burimin e pasurive, si edhe ka mosdeklarime të pasurisë dhe vlerës së tyre”.
Ndërkohë, që Gjykata e Apelit Administrativ kërkoi t’i hapet edhe një herë vlerësimi i kësaj kandidateje.
Gjykata Kushtetuese, e parashikuar me 9 anëtarë, aktualisht ka në detyrë vetëm një Vitore Tusha, e cila gjithashtu e ka përfunduar mandatin e saj. Të tjerët u larguan nga detyra pasi humbën betejën me Vetingun, përjashtuar ish-anëtarët Vladimir Kristo dhe Besnik Imeraj, të cilët dhanë dorëheqjen para procesit të rivlerësimit.
