Presidenti Ilir Meta është thirrur për t’u paraqitur më datë 6 shtator në Komisionin Hetimor parlamentar të ngritur për verifikimin e ligjshmërisë së vendimit të Kreut të Shtetit për të anuluar 30 qershorin si datë të paracaktuar për mbajtjen e zgjedhjeve vendore.
Ulsi Manja, me cilësinë e kryetarit të komisionit hetimor, tha se plani i hetimit të komisionit mund të ndryshojë, ndërsa bëri të ditur se i është kërkuar informacion 7 institucioneve, një pjesë e të cilëve kanë kthyer përgjigje.
Sipas Manjës, KQZ, Kolegji Zgjedhor, Qendra e Publikime Zyrtare, Policia e Shtetit, Prokuroria e Përgjithshme, përfshi edhe Presidencën, kanë bashkëpunuar me këtë komision, duke i dërguar materiale në formën e përgjgjigjeve kundrejt kërkesave të formuluara.
Komisioni ka marrë informacion të detajuar nga Policia e Shtetit dhe Prokuroria e Përgjithshme mbi krimet zgjedhore, duke nisur nga periudha 1 Janar-10 Qershor të 2019-s dhe deri në mbajtjen e zgjedhjeve lokale.
