Incidenti i rëndë që ndodhi mbrëmjen e së shtunës në Spitalin e Fierit, po verifikohet edhe nga Drejtoria e Standardeve Profesionale në Policinë e Shtetit.
Drejtori i Përgjithshëm i Policisë, Ardi Veliu, ka urdhëruar menjëherë pas ngjarjes, që aty të shkojnë edhe specialistët e Standardeve Profesionale, për të verifikuar të gjitha veprimet e mosveprimet e punonjësve të Policisë që ndodheshin në momentet e para në Urgjencën e Spitalit.
Sot pritet që të merret edhe një vendim konkret në lidhje me efektivin e Policisë, të cilit iu mor nga brezi arma e shërbimit. Burime nga Policia e Shtetit thanë dje se ende nuk ka nisur ecuria disiplinore për asnjë nga punonjësit që ndodheshin në spital. Por pasi të kryhet një hetim i thelluar nga specialistët përkatës, Drejtoria e Standardeve Profesionale do të marrë një vendim konkret, nëse efektivët kanë vepruar konform rregullave apo jo.
HETIMI
Policia e Shtetit njoftoi se për hetimin e kësaj ngjarjeje, drejtori i Përgjithshëm i Policisë së Shtetit ka ngritur një grup të posaçëm hetimor me specialistë të Hetimit të Krimeve të Rënda në Departamentin e Policisë Kriminale.
“Njëkohësisht, me urdhër të drejtorit të Përgjithshëm të Policisë së Shtetit në vendngjarje kanë shkuar edhe specialistët e Drejtorisë së Standardeve Profesionale në Polici, për të verifikuar veprimet e punonjësve që ishin në momentet e para në Urgjencën e Spitalit. Nën drejtimin e Prokurorisë së Rrethit Gjyqësor Fier po vijon puna për zbardhjen e plotë të rrethanave të ngjarjes, motivit të konfliktit si dhe vënien para përgjegjësisë ligjore të personave përgjegjës”, tha zyrtarisht Policia.
Nga ana tjetër, Policia e Fierit njoftoi dje se ka vënë në pranga 5 persona në lidhje me konfliktin në Levan, mes të cilëve edhe personi që plagosi me armën e punonjësit të Policisë një shtetas në Urgjencën e Spitalit.
“Nga veprimet e para hetimore rezultoi se shtetasi D.B. dyshohet se është autori i plagosjes me armë zjarri, i cili është kapur dhe arrestuar në orët e para të mëngjesit. Rezulton se konflikti ka nisur për motive banale në një lokal. Në cilësinë e provës materiale u bë sekuestrimi i një arme gjahu, dy mjeteve prerës dhe tri automjeteve. Nën drejtimin e Prokurorisë vijon puna për dokumentimin e plotë të kësaj ngjarje”, tha Policia. /Panorama/
