Një i paraburgosur që pritej të ekstradohej në SHBA dyshohet se vari veten mëngjesin e sotëm në Qendrën e Paraburgimit në Pejë. Ai akuzohej për vrasjen dhe zhdukjen e trupit të gruas së tij. Vrasja ishte kryer në Michigan të SHBA’së para 18 vitesh. Express iu sjell detaje rreth këtij rasti
Binak Gjergjaj nga Klina është gjetur i vdekur mëngjesin e sotëm në Qendrën e Paraburgimit në Pejë. 52-vjeçari dyshohet se është vetëvarur me çarçafë në banjon e dhomës së tij. Bashkë me të në dhomë kishin qenë edhe tre persona të tjerë.
Në Shërbimin Korrektues të Kosovës i kanë thënë Gazetës Express se Gjergjaj po mbahej në paraburgim që nga 14 qershori i këtij viti për një vrasje që e kishte kryer në Shtetet e Bashkuara të Amerikës para disa vitesh.
“Sot në mëngjes gjatë hapjes së dhomave dhe numërimit të të burgosurve, në banjon e njërës nga dhomat është gjetur i vetëvarur i paraburgosuri me inicialet B. GJ, në dhomë bashkë me të ishin edhe tre persona të tjerë. I paraburgosuri ishte në mbajtje nga data 14.06.2019 dhe ishte i vendosur në Qendrën e Paraburgimit në Pejë”, thuhet në përgjigjet e SHKK’së drejtuar Gazetës Express.
Gjergjaj akuzohej për vrasjen dhe zhdukjen e trupit të gruas së tij në vitin 2001.
Aferdita Gjergjaj, ish-bashkëshortja e Binak Gjergjajt, ishte zhdukur më 26 shkurt të vitit 2001, pasi ishte takuar me Binak Gjergjajn në Auburn Hills të Michganit për të diskutuar rreth një çështje të kujdestarisë që përfshinte fëmijët e çiftit.
Makina e Gjergjajt ishte gjetur në natën e 27 shkurtit të të njëjtit vit në parkingun e kinemasë së Auburn Hills. Telefoni e Afërdita Gjergjajt, çanta dhe disa fatura ishin në makinën e ish-bashkëshortit të saj, me të cilin ishte divorcuar dy vite para se të ndërronte jetë.
Në SHKK deklarojnë se për këtë rast janë njoftuar Policia e Kosovës dhe prokurori, të cilët kanë dalë në vendin e ngjarjes dhe po e hetojnë rastin.
Ndërkohë, lajmin për vdekjen e tij e ka konfirmuar për Gazetën Express edhe zëdhënësi i Prokurorisë Themelore në Pejë, Shkodran Nikçi.
“Në qendrën e paraburgimit në Pejë, një i paraburgosur dyshohet se është vetvarur. Me urdhër të prokurorit të shtetit, trupi i pajetë i viktimës është dërguar për obdukim. Viktima ka qenë nën masën e paraburgimit, lidhur me kërkesën për ekstradim në SHBA”, ka thënë Nikçi për Express.
Për këtë rast ka reaguar edhe Këshilli për Mbrojtjen e të Drejtave dhe Lirive të Njeriut. Ata kanë kërkuar që të bëhen hetime nëse ka arsye tjera rrethanore që kanë ndikuar në vetvrasjen e të paraburgosurit.
KMDLNj ka konstatuar se Qendra e Paraburgimit në Pejë ka ndërmarrë të gjitha veprimet e parapara që të shpëtojë jetën e të paraburgosurit por se një gjë e tillë ka qenë e pamundur t’i ndihmohet.
“Sipas raporteve të KMDLNj –së, i paraburgosuri B. Gj. Nuk ka treguar asnjë indikacion se ka prirje për vetvrasje andaj në rastin konkret nuk janë zbatuar masat e kontrollit, kujdesit dhe mbikëqyrjes së shtuar siç veprohet në rastet e tilla”, thuhet në komunikatën e tyre drejtuar mediave.
Ndryshe, Gjergjaj ishte arrestuar nga Policia e Kosovës më 13 qershor të këtij viti. Bashkë me të pas prangave ishte vënë edhe 82 vjeçari Ramiz Borduniqi, nën dyshimet se e kishte ndihmuar vëllain e tij për të zhvilluar një ndërmarrje të prostitucionit dhe narkotikëve në Fair Banks në Alaska. Borduniqi ka ndërruar jetë para rreth dy muajve në Kliniken e Neurologjisë të SHSKUK-së.
