Partia Socialiste pritet të vendosë sot mbi kandidaturën që do të garojë për zgjedhjet e pjesshme vendore në Bashkinë e Shkodrës pas tërheqjes së Valdrin Pjetrit, i cili rezultoi subjekt i ligjit të dekriminalizimit, për shkak se kishte fshehur një dënim të dhënë nga drejtësia italiane.
Pjetri, u shpall fitues nga votimet e 30 qershorit, çertifikoi mandatin nga KQZ dhe Gjykata, por opozita i publikoi një seri dokumentesh që provonin dënimin dhe dëbimin e tij nga Italia, që nuk ishin deklaruar më parë në formularin e vetëdekriminalizimit. Në kushte të tilla, prokuroria e përgjithshme, njësia e Dekriminalizimit, nisën hetimet ndaj Pjetrit, i cili u tërhoq nga marrja e detyrës si kryebashkiak, por u largua edhe si drejtues politik i qarkut të Shkodrës.
Në një situatë të tillë, bashkia e Shkodrës vijon të drejtohet nga Voltana Ademi, ndërsa socialistët pretendojnë për zhvillimin e zgjedhjeve të pjesshme.
Në këtë kuadër, ata pritet të përcaktojnë kandidatin që do të kenë në zgjedhje, megjithëse nuk dihet se si mund të zhvillohet një proces i tillë, përsa kohë Presidenti i Republikës, nuk njeh 30 qershorin si datën e mbajtjes së zgjedhjeve ndërsa ka dekretuar 13 tetorin.
Por, PS po formalizon procesin ndërsa ka mbledhur disa propozime, që do të shqyrtohen nga kryesia e PS-së.
Mes emrave të propozuar, sipas TCH, është edhe Senida Mesi, deputete e Shkodrës dhe ish-zv.kryeministre në mandatin e parë të qeverisë Rama.
Mesi konsiderohet ndër kandidaturat potenciale, ndërsa të tjerë emra janë Astrit Beci, mjek dhe ish-deputet i PS-së.
Një tjetër emër i propozuar është Zef Çuni, ish-zëvëndësministër i Kulturës në Qeverinë “Rama 1”, dhe Megi Ajtyresa, ish-kryetare e FRESSH-it.
Mësohet se emrat e propozuar janë depozituar në kryesinë e PS-së nga strukturat lokale të kësaj partie dhe deputetët e qarkut të Shkodrës.
