Që prej 24 korrik, një grup aktorësh dhe qytetarësh, kalojnë ditë e natë në ambjentet e Teatrit, duke organizuar shfaqje falas. Mbrojtja e Teatrit është kthyer në një kauzë të rëndëshme për këta aktorë që qëndrojnë aty.
Ndërsa ditën e djeshme në darkë, grupit protestues i janë bashkuar dhe vajza e shkrimtarit Ismail Kadare me bashkëshortin. Gresa Kadare është pedagoge në Francë dhe bashkë me bashkëshortin treguan mbështetjen e tyre në mbrojtje të teatrit.
“Dje, rreth orës 19:00 në sheshin e teatrit erdhi Gresa Kadare dhe Risto Siliqi (djali i Llazar Siliqit). Bashkëshortë, ajo pedagoge në Francë e ai kërkues shkencor në një kompani.
Kanë studiuar bio kimi dhe prej pothuaj 30 vitesh jetojnë në vendin e “lirisë, barazisë e vëllazërisë”. Vajza e shkrimtarit me të shoqin u ulën pranë Edmond Budinës dhe folën gjatë. Thanë se e kanë mbështetur gjithnjë kauzën. Thanë se përfaqësojnë vetveten dhe se nuk i janë fshehur atyre që mendojnë. Regjisori u rrëfeu 19 muaj protestë, 13 muaj përditë, e 30 ditë 24 orë. U rrëfeu “24 korrikun”. Bashkëshortët treguan mbështetjen e tyre në mbrojtje të teatrit.
Më pas, kur erdhi ora e fjalimeve në shesh, të dy u ulën mes njerëzve. Edmond Budina i prezantoi dhe i falenderoi.
“Jemi njerëz që e duam teatrin. Njerëz që besojmë. Ne jemi bashkë. Nuk na përçan askush, kam kënaqësinë të them se sonte kauzës sonë i shtohen edhe dy miq. Janë dy shkencëtarë. Gresa Kadare dhe Risto Siliqi. Ju faleminderit që jeni me ne.
Ndaj ky teatër nuk do bjerë. Teatro të rinj të bëhen sa të duan. Këtu është vënë Doruntina, Nata me hënë, Gjenerali i ushtrisë së vdekur të Ismail Kadaresë”, tha Budina, shkruan GSH.
Ndërsa, vetë Kadare nuk është shprehur asnjëherë për çështjen e shembjes së Teatrit Kombëtar.
