Nga Klodian Tomorri
Kjo puna e faturave të hoteleve që flenë zyrtarët e shtetit nëpër udhëtime zyrtare apo private më kujton një histori. Një ish-kryeministër pyet vartësin e tij ministër; A kemi korrupsion në qeveri ne?
Ish ministri ishte burrë i zgjuar.
-Vallai o shef kjo pune është kështu- i thotë. “Çdo ministri, 5 milionë euro ne vit ja ofrojnë. Tani se kush nga ministrat i merr dhe kush jo, këtë nuk di ta them.”
Kjo është histori e vërtetë.
Ma merr mendja se shumica e zyrtarëve të shtetit qeshin me këtë punën e faturës së hotelit të Ministres së Drejtësisë. Madje disa prej tyre, ndoshta thonë edhe sa budalla është ky popull që bën kaq shume zhurme për këtë thërrimën e vogël. Ministrat po e po, por edhe drejtorët e thjeshtë në administratë.
Një faturë 700 euro, është një pikë e vogël, shumë e vogël uji, në oqeanin gjigand të shpërdorimeve, abuzimeve, vjedhjeve dhe korrupsionit që ndodh në shtet. Me 700 euro në Shqipëri nuk i afrohesh dot as rojes në ministri.
Por pavarësisht kësaj, pavarësisht se është një shpërdorim ordiner, banal dhe i papërfillshëm në gropën gjigande të korrupsionit endemik që ndodh çdo ditë në shtet, prapë është i pështirë. Për një arsye mbi të gjitha. Je zyrtar i një prej shteteve më të varfra në Europë. Pse duhet ta teprosh deri në atë pikë.
Dreqi ta hajë, po mund të flesh shumë rehat në hotelet më të mira të Europës edhe me 200-300 euro në natë. Direkt te luksi si të babëzitur.
Emmanuel Macron festoi 40 vjetorin në Chateau de Chambord, kështjellën ekstravagante të nderuar nga Fransua-ja i Parë. Rezervoi për një fundjavë bashkë me familjen për një faturë që ishte rreth 1 mijë euro edhe e masakroi shtypi. Dhe ky i kishte paratë e veta, jo me shpenzimet e shtetit.
David Cameron dhe Angela Merkel kanë gati 20 vjet që i bëjnë pushimet në të njëjtin vend. Madje 5 vitet e fundit, gazetarët i kanë kapur me të njëjtat rroba kur shkojnë me pushime. Dhe buxheti që kanë administruar apo administrojnë këta është të pakten 100 herë më i madh se buxheti i qeverisë shqiptare.
Nuk e vret shtetin ajo fatura 700 euro, por çështja është tek gjesti. Të bën të dukesh si i babëzitur. Si këta që shkojnë nëpër dasma apo festa ku ka ushqim falas dhe hanë për gjithë javën. 🤦♂️🤦♂️🤦♂️
