Gjykata e Tiranës ka caktuar masën “arrest me burg” në mungesë për dy vëllezërit Kusi, të cilat katër ditë më parë dyshohet se ekzekutuan me plumb në kokë të riun, Indrit Çelaj.
Dy vëllezërit Albano dhe Griseldo Kusi do të shpallen në kërkim ndërkombëtar në lidhje me krimin e kryer në zemër të Tiranës, raporton BW.
Një ditë më parë, togat e zeza caktuan masën “arrest me burg” për pronarin e shtëpisë ku ndodhi ngjarja, babain e dy vëllezërve Kusi, Bujar Kusin, si dhe për dy persona të tjerë si Ferdinand Bakallin e Ali Sulën, ndërsa për Luan Çakën, gjykata dha masën ‘arrest në shtëpi’.
Indrit Çela u qëllua me plumb në kokë gjatë kohës që po punonte te vila e vëllezërve Kusi, ndërsa disa orë pas ngjarjes, ai ndërroi jetë në spitalin e Traumës.
Një ditë më parë, në sallën e gjyqit, dy prej punëtorëve në vilën e familjes Kusi, kanë zbardhur detaje mbi krimin e rëndë.
Debati që çoi në ekzekutimin e 26-vjeçarit, që ishte një teknik kondicionerësh, nisi nga një vrimë për shkarkimin e tubit të kondicionerit.
Ngjarja ka ndodhur në një nga tualetet e katit të parë të ndërtesës, e cila po ndërtohej në zonën e “Myslim Shyrit” në Tiranë.
Sipas punëtorëve, në vilë erdhi Griseldo Kusi, djali i pronarit, për të kontrolluar punimet.
“Kur na përshëndeti, dëgjoi një zhurmë. Eldo lëvizi dhe u bë nervoz. Shkoi andej nga vinte zhurma dhe filloi të bërtiste me Indritin. Dëgjuam ti thoshte po këtu çfarë po bëhet.
Përse po e hap atë vrimë. Ku do e çosh shkarkimin e kondicionerit. Në përgjigje, Çelaj ka thënë se nuk e di unë ku do jetë shkarkimi”, mësohet të kenë thënë punëtorët në dëshminë e tyre.
Pas kësaj, Griseldo Kusi ka nxjerrë armën nga brezi dhe qëlluar me një plumb në kokë të riun, duke i shkaktuar rënien në koma dhe më pas vdekjen në spital.
Sipas punëtorëve, Eldo u largua me nxitim, ndërsa në dorë mbante një çantë.
