Sipas dëshmive të dy punëtorëve në vilën ku punonte Indrit Çelaj në momentin kur u vra, ndaj tij ka qëlluar Griseldo Kusi.
Në dëshmitë e zbardhura nga News24 dy punëtorët kanë dhënë një version pothuajse të njejtë të ngjarjes. Sipas tyre, Griseldo Kusi (Eldo siç e thërrisnin), ka ardhur i vetëm në objekt atë ditë. Ai sipas tyre vinte disa herë për të kontrolluar punimet. Me të dëgjuar një zhurmë trapani në një nga tualetet e katit të parë ku po punonte Indit Çelaj, Griseldo Kusi kishte shkuar atje i nervozuar, sipas dëshmive të punëtorëve.
“Po këtu ç’bëhet” i kishte bërtitur ai me zë të lartë Çelajt, “Çfarë po bën, përse e hap atë vrimë aty dhe ku do e çosh shkarkimin e kondicionerëve” kishte vazhduar ai. Sipas dëshmive Indrit Çelaj i ishte përgjigjur se nuk e dinte se ku do të ishte shkarkimi. Griseldo më pas i tha “kur se di ti nga do ta di unë”. Në këtë moment ai kishte nxjerrë pistoletën dhe ja kishte vendosur në kokë Indrit Çelës dhe më pas kishte qëlluar.
Sipas dëshmive Griseldo Kusi kishte marrë gëzhojën dhe ishte larguar me shpejtësi. Njëri nga punëtorët në dëshminë e tij deklaron se mbas ngjarjes ai ishte larguar i frikësuar në shtëpi.
Paraditen e sotme gjykata e Tiranës vendosi masën arrest me burg për Bujar Kusin, babain e dy vëllezërve Kusi në kërkim. Ai i tha gjykatës se nuk ndodhej në vendngjarje kur kishte ndodhur krimi por kur kishte mbërritur kishte mësuar se Çelaj ishte konfliktuar me dikë tjetër më parë.
Ky episod nuk shfaqet në dëshmitë e dy punëtorëve. Gjithashtu nuk përputhet edhe fakti se një i person tjetër i përfshirë në këtë ngjarje, Lorenc Veliaj, ka deklaruar se vëllezërit Kusi i kanë kërkuar atij të kryejë krimin në këmbim të parave.
Gjykata la në burg edhe kontraktuesin e punëtorëve, Ferdinand Bakalli si dhe të dyshuarin Ali Sula. Për punëtorin Luan Caka u dha masa “arrest shtëpie”.
