Edmond Dosti, në kundërsulm. Një ditë pas intervistës ekskluzive të trajnerit Franko Lerda në “Panorama Sport”, ish-sulmuesi kampion i të kuqve i është përgjigjur italianit përmes gazetës.
Sipas Dostit, edhe këtë herë Lerda tregoi se është një trajner kukull me përgjigjet që jep sa i përket etiketimit si arrogant. Ish-bomberi i sezonit 1992- 1993 i kujton italianit se trofeun e parë në karrierën e tij si trajner e ka marrë pikërisht së fundmi me Partizanin.
“E vërtetë është ajo që thotë se nuk më njeh mua dhe për këtë i jap të drejtë, ashtu siç edhe unë nuk e njoh mirë atë. Megjithatë, sapo ai u emërua trajner i Partizanit, unë gërmova në internet dhe vura re se nuk kishte ndonjë arritje. Madje trofeun e parë si trajner e kishte fituar me Partizanin. Mund të them se me deklaratat që ka bërë, ai ka treguar vërtet se është kukull. Arrogancën e ka treguar edhe kur është pyetur për lojtarët, duke mos dhënë asnjë përgjigje konkrete. Madje edhe kur e pyesin për lojtarë si Broja, që ka ardhur së fundmi në skuadër. Në vend që të japë përshtypjen e tij, ka braktisur intervistat. Nuk më duket etike ajo që Lerda ka bërë së fundmi”, ka thënë fillimisht Dosti.
“DËSHTIMIN KUJT DO IA FATUROJË?!”
Lerda ia dedikoi trofeun e Superkupës drejtorit Olsi Rama, ndërsa në bisedën për gazetën, ndër të tjera u shpreh: “U besoj zgjedhjeve që bën Olsi Rama dhe njerëzit e tij, sepse ata arritën të ndërtonin një skuadër kampione dhe mendoj se në këtë moment kanë njohuri më shumë se unë në këtë aspekt”.
Për këtë, Dosti ka një përgjigje: “Sa u përket meritave që ai ua jep drejtuesve në këtë moment, një pyetje kam: Po kur do të dështojë, kujt do t’ia faturojë?!. Me ato që ka thënë së fundmi, ka konfirmuar edhe një herë se ka dalë kukull e vërtetë”.
