I riu që u qëllua me plumb në kokë rreth orës 11:30 të paradites së sotme në rrugën Myslym Shyri, pak metra larg Drejtorisë së Policisë të Tiranës, ishte duke punuar në një pallat që po rikonstruktohet.
I plagosuri, sipas policisë, nuk është identifikuar, ndërkohë që ndodhet në spitalin e Traumës, ku po i nënshtrohet një operacioni. Gjendja e tij shëndetësore është e rëndë dhe ai ndodhet në gjendje kome, raporton BW.
“Dyshohet të jetë qëlluar me armë zjarri një shtetas, ende i paidentifikuar, rreth 30 vjeç, pranë një objekti në rikonstruksion”, bëri të ditur policia pa dhënë detaje.
Policia mësohet se ka marrë në pyetje disa persona, që mendohet se ishin në vendin e ngjarjes.
INFORMACIONI PARAPRAK
Sot rreth orës 11:30 në rrugën “Myslym Shyri”, dyshohet të jetë qëlluar me armë zjarri një shtetas, ende i paidentifikuar, rreth 30 vjeç, pranë një objekti në rikonstruksion.
Shtetasit i është dhënë ndihma e parë dhe u transportua në spital për ndihmë të specializuar.
Grupi hetimor vijon punën për zbardhjen e plotë të rrethanave të ngjarjes.