Mihal Kokëdhima, pronari i lokalit “Pnorma” në Porto Palermo, i cili po shembet nga IKMT prej mëngjesit të sotëm, ka tërhequr vëmendjen edhe të mediave britanike.
Daily Mail ka publikuar në faqen e saj në rrjetin social “Facebook”, pamjet kur Kokëdhima ndodhej mbi automjetin me të cilin udhëtonin turistët spanjollë.
Kështu pas mediave spanjolle që i bënë jehonë incidentit mes Kokëdhimës dhe turistëve, një tjetër media e huaj ka zgjedhur t’i kushtojë vëmendje ngjarjes në fjalë.
Incidenti nisi në lokalin që ndodhet në Porto Palermo, ku grupi i turistëve spanjollë kishin ndaluar për të drekuar.
Turistët spanjollë u larguan pa paguar nga lokali, ndoshta duke mos i pëlqyer shërbimi ose gatimi, ndërsa pronari Kokëdhima i ka ndjekur nga pas, duke vijuar incidentin që ka bërë xhiron e botës përmes rrjeteve sociale dhe mediave.