Nga Boldnews.al
Institucionet e reja të drejtësisë, mesa duket, paskan qenë të etura për fondet e buxhetit të shtetit. Pak javë pasi Këshilli i Ministrave çliroi paratë për Këshillin e Lartë Gjyqësor, ky institucion nuk vonoi shumë dhe zhvilloi tenderin për blerje automjetesh.
Dhe, duket se nuk është kursyer aspak për shpenzimin e fondeve publike. KLGJ, e cila është e përbërë nga 11 anëtarë, ka blerë plot 22 automjete, të gjitha të reja.
Në një tender të zhvilluar së fundmi, Këshilli i Lartë Gjyqësor ka zhvilluar procedurën për blerjen e 22 automjeteve të reja. Në tender kanë marrë pjesë 3 kompani.
Në përfundim të procedurave, KLGJ ka shpallur fitues kompaninë “CLASSIC”, në pronësi të Agron Papulit. Vlera e blerjes së 22 automjeteve arrin në shumën e 33 milionë lekëvë të reja, rreth 300 mijë euro.
Sipas të dhënave të Buletinit të Prokurimit Publik, në tender kanë marrë pjesë edhe kompanitë “Mektrin Motors” dhe “Hyundai”. Por, këto dy kompani kanë dhënë oferta më të larta dhe rrjedhimisht nuk janë shpallur fituese.
Sasia e automjeteve të blerë duket e ekzagjeruar, duke mbajtur në konsideratë se Këshilli i Lartë Gjyqësor ka 11 anëtarë, të cilët janë të gjithë në Tiranë, si edhe faktin që selia dhe aktiviteti i institucionit janë të përqëndruara në kryeqytet.
Këshilli i Lartë Gjyqësor është një ndër institucionet e reja, të parashikuara nga Reforma në Drejtësi. Ky institucion është përgjegjës për karrierën e gjyqtarëve, përfshirë emërimet, transferimet dhe masat disiplinore ndaj tyre.
Për vitin 2019, Parlamenti i Shqipërisë ka miratuar strukturën e Këshillit të Lartë Gjyqësor, i cili përbëhet nga gjithësej 58 punonjës, nga anëtarët e deri tek të specialistët në shërbime mbështetëse.
Ndaj, blerja e 22 automjeteve për një numër kaq të vogël punonjësish duket e tepruar.
Por, jo vetëm kaq. Në bazë të propozimit të Këshillit të Lartë Gjyqësor, Parlamenti ka miratuar edhe shpërndarjen e posteve në administratën e këtij institucioni.
Krahas 11 anëtarëve, KLGJ në përbërje të tij ka edhe 14 drejtorë, si edhe 15 shefa sektori, të cilët, në total përbëjnë rreth 70% të të gjithë stafit. Pjesa e mbetur, 18 të tjerë, janë specialistë, një numër më i vogël sesa drejtuesit.
Pra, KLGJ duket se është një institucion i mbushur më së shumti “me shefa” sesa me punonjës. Do të jetë interesante për të parë se, me kaq shumë “shefa”, kush do të bëjë punën në atë institucion.
Numri i lartë i “shefave”, gjithësesi, e dha efektin e parë-ata të gjithë duan nga një automjet në dispozicion dhe për këtë arsye, Këshilli i Lartë Gjyqësor po mundohet t’u plotësojë dëshirën, duke blerë, që në “goditjen” e parë, 22 automjete të reja. Natyrisht, me paratë e publikut.
DENONCO