Kryeministri Italian Giuseppe Conte njoftoi dorëheqjen e tij në Senat këtë të martë.
“Në fund të këtij debati do të shkoj te Presidenti i Republikës për të dhënë dorëheqjen”, tha ai. “Tani Presidenti i Republikës do të drejtojë vendin në këtë hap delikat”, tha Kryeministri në fjalimin e tij në Senat, “shfrytëzoj këtë mundësi ta falënderoj për mbështetjen që më dha”.
Gjatë fjalës së tij, kryeministri italian sulmoi ashpër Ministrin e Brendshëm Matteo Salvini duke e akuzuar se është udhëhequr nga interesa personale duke mos respektuar rregullat konsitucionale.
“Ne nuk kemi nevojë për njerëz me fuqi të plota, por për njerëz me kulturë institucionale dhe sens përgjegjësise,” tha kryeministri italian.
Conte ka folur gjithashtu dhe për dyshimet e finacimit rus për Lega-n e Salvinit duke kërkuar hetime të thelluara mbi çështjen.
Pas debatit në Senat, i cili do të vazhdojë plot tre orë, Kryeministri italian do t’i paraqesë zyrtarsiht Presidentit Matarrela dorëheqjen zyrtare.
Lideri i Lega-s Matteo Salvini, teksa ditë më parë u përpoq të dilte nga cepi i ngushtë ku kishte përfunduar pas krizës që duket se përfundoi në autogol, tani i mbetet veç të bëjë llogaritë për zgjedhjet e parakohëshme dhe reagimin e njerëzve të vet.
