Depozitohet në KQZ, dorëheqja e Valdrin Pjetrit, i shpallur si kryebashkiak i Shkodrës pas votimeve të 30 qershorit.
Kryetarja e re e Këshillit Bashkiak Shkodër, Brisela Kadia, e zgjedhur një ditë më parë në mbledhjen konstituese, informoi mbi vakancën në krye të bashkisë.
Tashmë, KQZ i duhet të shqyrtojë kërkesën për të shpallur pavlefshmërinë e mandatit të Pjetrit si kryetar bashkie.
Duket se socialistët do të tentojnë të venë në lëvizje KQZ për marrjen e një vendimi mbi Shkodrën, njëlloj sikundër vepruan në rastin e dekreteve të Presidentit, që u shpërfillën me vendime të Komisionit.
Pjetri nuk mori zyrtarisht detyrën e kryebashkiakut, pasi iu publikuan vendimet e drejtësisë italiane, që provonin dënimin e tij me 18 muaj burg për shpërndarje droge. Vendimi është dhënë në 2003-in, ndërsa nuk ishte deklaruar prej tij në formularin e dekriminalizimit.
Fillimisht Pjetri mohoi akuzat, më pas pranoi përgjegjësinë, por duke e lidhur me moshën e tij të re, ku u kap dhe u dënua.
Tashmë, Bashkia e Shkodrës është në ngërç, kjo për faktin se Presidenti i Republikës, nuk njeh 30 qershorin si datë zgjedhjesh, ndërsa ka dekretuar 13 tetorin.