Ministrja e Ekonomisë dhe e Financave Anila Denaj ka paralajmëruar publikimin e emrave të kompanive, të cilat nuk kanë shlyer detyrimet e tyre.
Denaj tha se javën e ardhshme do të publikohen gjithashtu edhe inspektorët doganorë që do të shkojnë për masa disiplinore, pasi nuk kanë zbatuar detyrat.
“Takimi ynë i radhës do jetë javën e ardhshme. Do të flasim javën tjetër me shifra dhe me emra kompanish dhe me numër inspektorësh të cilët do të shkojnë për masa disiplinore, pasi mendojmë se ky proces nuk mund të shkojë vetëm me gjobitje të bizneseve për të cilat ka parregullsi por sigurisht edhe për ata inspektorë që në vite kanë lejuar që këto parregullsi të mos evidentohen dhe të mos krijojnë këtë ngërç operacional, i cili sot është fokusuar totalisht për të gjithë ne.
Nga ana tjetër është një vëmendje që na tregon se ka shumë gjëra për të përmirësuar brenda administratës sonë dhe jemi duke punuar paralelisht edhe për të përmirësuar administratën doganore në veçanti”, u shpreh Denaj.