Kryeministri Edi Rama ka publikuar në rrjet disa foto mbi atë që e quan programi kombëtar i rilindjes urbane në Shirokë.
Në një kohë kur në Shkodër pritet mbledhja e konstituimit të Këshillit Bashkiak dhe opozita ka nisur protestën, Rama ka zgjedhur të postojë në rrjet projektet për Shkodrën, që sipas tij do të zhvillojnë turizmin në këtë zonë.
“Vazhdon gur pas guri, në kuadër të Programit Kombëtar të Rilindjes Urbane, projekti i transformimit të Shirokës magjike e të rrënuar në dekada të tëra harrese😥
Ky projekt transformues i qendrës së Shirokës, do të pasohet nga projekti i madh i një nderhyrjeje tërësore, me rindërtimin e rrugës e të infrastrukturës së ujësjellës-kanalizimeve, si edhe ndërtimin e “Lungolagos😉”, shëtitores përgjatë vijës liqenore nga Shiroka deri në Zogaj, një potencial deri më sot krejt i fjetur dhe i jashtëzakonshëm i zhvillimit turistik të Shkodrës😍 #ShkodraqëDuam☀️ #ShqipëriaqëDuam”, shkruan Rama në rrjet.
Bashkia e Shkodrës ndodhet në një ngërç ligjor për faktin se mandati i kryebashkiakes aktuale, Voltana Ademi përfundon në 20 gusht, ndërsa i zgjedhuri i Ramës si kryebashkiak përmes votimeve të 30 qershorit, tashmë është subjekt i ligjit të dekriminalizimit dhe s’mund të marrë detyrën.
