“Vrasës dhe trafikantë në mbledhjen e Këshillit narkomonist të Shkodrës”. Kështu shprehet ish-kryeministri Sali Berisha duke iu referuar prezencës së sotme në mbledhje të Martin Cubit, i cili ka mbajtur për 15 vjet mandatin e kryetarit të Komunës së Pultit.
Në denoncimin e tij, Berisha i referohet një mesazhi ardhur në adresë të tij.
“Zoti Berisha sot ne mbledhjen e keshillit bashkiak ne Shkoder ishte i pranishem ish kryekomunari vrases i partise socialiste. Martin Cubi qe e ka ndryshuar emrin ne Sokol ka vrare nje person ne vitin 2009 dhe ju e keni denoncuar per trafikant droge.Ai ka kandiduat te bijen per keshilltare. Moda e re e rilindasve eshte qe bijt e vrasesve dhe trafikanteve te marrin postet. Gjithashtu si ç’e keni denoncuar ju dhe te tjere Martin Cubi eshte trafikant dhe me Bardhok Planen kontrollon parcelat e Dukagjinit te cilat ruhen, korren nga ata nga ai dhe shperndahen po nga ata”, thuhet në mesazhin e publikuar nga Berisha.
Martin Cubi, në një reagim për mediat në dhjetor të vitit 2015, është shprehur se vrasja e Dodë Hilës, ka ardhur në kushtet e vetëmbrojtjes ekstreme dhe për këtë gjë është shpallur i pafajshëm në gjykatën e shkallës së parë dhe atë të apelit.
“Më datën 27 prill të vitit 2009, pak metra larg Spitalit Rajonal të Shkodrës, jam goditur rëndë me thikë në pjesën e qafës. Në kushtet e vetëmbrojtjes kur agresori tentoi të më godiste sërish me thikë kam nxjerrë armën që mbaja me leje dhe kam qëlluar në drejtim të autorit, i cili për fat të keq humbi jetën. Unë kam shpëtuar nga kjo ngjarje vetëm falë faktit që ndodhesha fare pranë spitalit, ku ndihma ishte e menjëhershme, pasi plaga ishte shumë serioze”.
