Pikat e Kalimit Kufitar në Kakavijë, Kapshticë dhe Qafë Thanë, në 24 orët e fundit, pothuajse janë paralizuar, ndërsa qindra automjete, duke krijuar rradhë kilometrike, presin në rradhë.
Shkak, sipas autoriteteve, është fluksi i lartë i lëvizjeve, për shkak të kthimit të emigrantëve në vendet ku jetojnë dhe punojnë, por edhe mungesës së plotë të kapaciteteve në përpunimin e të dhënave, nga fqinjët.
Raportohet se mijëra qytetarë, shqiptarë dhe të huaj, janë regjistruar në pikat e kalimit kufitar duke hyrë ose dalë në territorin shqiptar.
Situata paraqitet më problematike në Kakavijë dhe Kapshticë, që janë edhe pikat me fluksin më të lartë të lëvizjes mes Shqipërisë dhe Greqisë.
Ndërkohë në Qafë Thanë paraqitet një situatë më pak e rënduar se dy pikat e tjera të kalimit kufitar.
Pavarësisht se probleme të tilla regjistrohen pothuajse çdo vit, në të njëjtën periudhë, duket se zgjidhja e vetme që u ofrohet qytetarëve që presin me orë të tëra në rradhë, është ose të shmangin flukset e lëvizjeve, ose mos vijnë në Shqipëri për pushime në gusht.
