Qendra Kombëtare Urgjencës Mjekësore ka dhënë udhëzime në rrjetet sociale për pushuesit, se si ta japin ndihmën e parë për të mbytyrit në det.
“Në këtë video ju do të shikoni në pak minuta se si duhet të veprojmë kur e kemi nxjerrë të mbyturin nga deti dhe në çdo rast arresti kardiorespirator.
Pra si bëhet masazhi kardiak. Për këtë nuk është e thënë që të jesh personel mjekësor, masazhin e bëjnë dy duar.
Telefono 127 dhe do të kesh orientimin e menjëhershëm dhe të duhur!
Ne na duhen dy duart e çdo qytetari për të mbajtur në jetë një person derisa të mbërrije ekipi mjekësor. Komuniko me 127 pa ndërprerje sepse nuk vjen personi me të cilin po flisni, por ekipi më i afërt me ju, i cili niset menjëhere!”, thuhet në udhëzimin e bërë publik në rrjet.
Mesazhi për ndihmë në raste mbytjesh është dhënë pak i vonuar, madje në fund të sezonit veror. Ndoshta këshillat mund t’i shërbejnë pushuesve vitin e ardhshëm ose në pak ditë që kanë mbetur.