Rama bie “Dëshmor i Rilindjes” në kështjellën e Shkodrës

Nga Boldnews.al

Më 20 qershor Rama mbërriti në Shkodër me gjithë forcat e mundshme të policisë, veçarisht ato të Ndërhyrjes së Shpejtë. E kishte sfidë për të mposhtur qytetarët që dolën me parullat “Rama ik”. Gazi lotsjellës në sytë e qytetarëve dhe ca metra më larg, Rama që thurte elozhe për kandidatin e tij Valdrin Pjetri ishin shfaqjet që Rilindja i shiti si trumf. Në këtë betejë u duk se fitoi Rama, por luftën me Shkodrën e humbi dje, pa u qitur asnjë armë e pa u hedhur asnjë gurë…

Një prej “gjeneralëve” të tij, pikërisht Valdrin Pjetri, që më 30 qershor mori Shkodrën me dhunën e pushtetit, del se është dënuar në Itali për trafik të lëndëve narkotike. Si për ironi, ishte bashkia e fundit që ende nuk e kishte marrë formalisht, ndërsa 60 të tjerat ranë një e nga një në duart e Rilindjes.

“Ai është dënuar nga Gjykata e Firences, me vendimin e formës së prerë të datës 12 qershor 2003, me 18 muaj burg dhe 1000 Euro gjobë, për veprën penale “shpërndarje, prodhim dhe trafikim i lëndëve narkotike dhe lëndëve të tjera të paligjshme psikotrope”, të kryer në bashkëpunim. Për shkak të marrëveshjes së pranimit të fajësisë, gjykata ka urdhëruar pezullimin e dënimit. Më datë 3 shkurt 2003, Valdrin Pjetrit i është revokuar leja e qëndrimit dhe më datë 4 shkurt 2003 ndaj tij është marrë masa e dëbimit nga shteti italian”, u shpreh Sekretari i Përgjithshëm i PD-së, Gazmend Bardhi.

Pas publikimit të dokumenteve një ditë më parë nga PD, Valdrin Pjetri duket se nuk do ta gëzojë karrigen e kryetarit të Bashkisë së Shkodrës, ku ai nuk është ulur ende. Kryeministri e shiti shpejt të preferuarin e tij. Sot Rama të tregon se nuk bën kompromis kundër ligjit dhe se nuk ka ndërmend të mbrojë askënd që e ka shkelur atë, duke i ndarë rrugët me Valdrinin.

LEXO EDHE  KSHM letër KE-së: Rama mos kopjojë Erdoganin ...

Kryeministrit nuk i ra vetëm Shkodra, por e gjithë Shqipëria, ku me këtë rast u vërtetua përfundimisht se ky njeri nuk mund të qeverisë nëse pranë nuk ka trafikantë droge, persona të korruptuar, sherrxhinj të regjur dhe kapadai që blejnë vota e shantazhojnë qytetarë.

“Nuk dija gjë”-thotë Edi Rama për dënimin e Valdrin Pjetrit në Itali. E njihte për djalë të mirë, edukuar dhe një nëpunës të zotin, por i del se në të shkuarën ishte marrë me pak trafik droge, qoftë edhe me një sasi të papërfillshme kanabisi, kur ishte student në Itali.

Një pyetje e vazhdueshme po bëhet nga qytetarët: A nuk kanë mbetur shqiptarë që nuk merren me drogë që të promovohen për të qeverisur? Si është e mundur që Rama vijon të bëjë sërish të njëjtin ‘gabim’ duke promovuar trafikantë dhe të majmur nga korrupsioni? Kjo është një pyetje që nuk duhet bërë më kurrë. Kryeministri e ka treguar që nga viti 2013 se me këtë kategori erdhi në pushtet, me atë do të mbahet dhe prej tyre po vijon të na qeverisë, qoftë edhe me më të zezat që ka njohur ndonjëherë vendi, me koston e instalimit të një minidiktature.

Fati e deshi që Rama të binte në Shkodër, pikërisht në zonën që kurrë nuk mundi ta merrte me votë. Në këtë qytet etalon që përjetoi më shumë se çdo krahinë tjetër e Shqipërisë diktaturën komuniste.  Ti fyesh shkodranët me vendosjen e një kryebashkiaku me të shkuar të errët në trafikun e drogës, është më shumë se e rëndë. Valdrini, kuptimi i së cilës është “Vala e Drinit”, këtë herë mund të marrë me vete edhe kryeministrin.

Morali i votimeve të 30 qershorit është i rënë, qoftë edhe me një episod, që kurrsesi nuk është aksident, por thelbi i një qeverisjeje.