Një shqiptar, emigrant në Slloveni, ka humbur jetën në Drenas të Kosovës, ku kishte shkuar për të kaluar pushimet.
Agim Dvorani u aksidentua nga nje makinë, dhe pavarësisht ndihmës së shpejtë mjekësore nuk mundi të mbijetonte.
Vëllai i Agimit ka treguar si ka ndodhur ngjarja.
“Ishim duke kaluar rrugën, kur një makinë me shpejtësi mbi 150 km/h goditi Agimin. Fillimisht shoferi u ndal dhe unë i kam thënë të lutem më jep ndihmën e parë. Shoferi më është përgjigjur “jam me udhëtarë”, aty e kam humbur durimin dhe e kam sharë”, ka thënë vllai i të ndjerit.
Dëshmitari i kësaj ngjarje ishte edhe kushëriri i tij, Valdeti.
“Bashkë me vëllain e të ndjerit, i kemi dhënë ndihmën e parë, kam marrë telefonin dhe kam tentuar të thërras ambulancën por nuk arritëm ta mbanim në jetë”, ka thënë kushëriri i të ndjerit.
Sipas banorëve të asaj lagje, vetëm në 100 metra rrugë të lagjes kanë humbur jetën 9 viktima. Kjo për shkak se nuk ka vendkalime. E për këtë banorët e lagjes kanë paralajmëruar një protestë.
