Manuel Solazzi është një nga fansat më të mëdhenj te Daniele De Rossi-t dhe mbrëmjen e sotme do të qëndrojë zgjuar për të shikuar debutimin e idhullit të tij me fanellën e Boca Junios në 1/16-at e Kupës së Argjentinës. Ndeshja do të fillojë në orën 02:10 me orën tonë.
“Daniele është si një ultras në fushë, kjo është arsye e pasionit dhe respektit për De Rossi-n”, ka deklaruar Solazzi për revistën “Ole”. 43-vjeçari nga Roma ka marrë fanellën verdheblu të skuadrës së Buenos Aires dhe ka një ëndërr në sirtar: të takojë De Rossi-n dhe të ndjekë Superklasiken në “Tempullin” e Bombonera-s.
“Do ta ndjek shumë Boca-n, tifozët e saj janë shumë të zjarrtë”, ka shtuar tifozi romanist. “Fanella më është dhuruar nga një mik, e ka blerë në internet në dyqanin e Boca-s. Ka kushtuar rreth 100 euro, por ia ka vlejtur”.
Ndërkohë, trajneri i Boca Juniors, Gustavo Alfaro, e ka grumbulluar Daniele De Rossi-n për ndeshjen kundër Almagro-s dhe ish-kapiteni i Roma-s duhet të zbresë në fushë nga minuta e parë dhe të bëjë debutimin me fanellën e “Xeneize”.
Do të jetë fanella e parë që De Rossi do të veshë pas asaj verdhekuqe dhe asaj të kombëtares së Italisë.
