Sipas asaj që ka shkruar “Sky Sport”, në edicionin informativ, me burime brenda klubit të Milanit, drejtuesit Maldini dhe Boban, përfshirë këtu edhe administratorin e deleguar Gazidis, nuk kanë ndër mend që të shesin as Donnarumma, por as edhe Suso.
Kjo për të treguar se në merkaton e kohëve moderne, nuk mjaftojnë oferta të vogla për të lëshuar yjet, por duhet të jenë super bindëse. Kuqezinjtë e konsiderojnë portierin si pikën më të fortë dhe spanjollin si lojtar me teknikë dhe që mund të zgjidhë ndeshjet, ndaj nëse dikush i kërkon, duhet t’i paguajë për vlerën që klubi i ka vendosur.
Praktikisht, nëse PSG do Donnarumma, atëherë duhet të paguajë rreth 60 mln euro, ndërsa nëse duan Suson, jo më poshtë se 35 milionë euro.
Del nga merkato edhe Borini. Futbollisti italian ka bindur trajnerin Giampaolo dhe shihet si një xhol që mund të luajë në çdo pozicion, në moment nevojë. Nuk ka kushtuar shumë dhe ka një rrogë brenda standarteve.
Të vetmit që janë në shitje janë Rodriguez, Calhanoglu dhe Laxalt. Andrea Conti, vetëm në huazim ose me oferta mbi 25 mln euro.
