Nga Boldnews.al
Delvina ka një shesh qëndror të rikonstruktuar nëpërmjet nismës së qeverisë: “Për Rilindjen urbane”, por prej dekadash tashmë nuk ka ujë të pijshëm dhe jo vetëm këtë mungesë…
Rreth 7500 banorët e Delvinës përdorin vetëm një çezmë në një prej urave të qytetit për të mbush bidonat me ujë. “Është i vetmi ujë që pihet në gjithë qytetin”- tregojnë banorët.
“Megjithëse jemi vetëm 3 km larg në vijë ajrore nga Syri i Kaltër ne thahemi për ujë”- shprehet një tjetër banor. Por problemi nuk është vetëm uji i pijshëm, por edhe ai që përdoret për larje. “Vjen vetëm 4 orë në ditë, dy në mëngjes herët dhe dy orë pasdite”- shprehen banorët.
Në këto ditë të nxehta ku termomentri arrin deri në 41 gradë, mungesa e ujit bëhet edhe më shqetësuese. Por nga kjo situatë nuk bën përjashtim as spitali bashkiak. Temperaturat e larta kanë shtuar numrin e pacientëve që shfaqen me virozat e stinës, por ajo që gjen në këtë spital është vetëm një mjeke pensioniste, rreth të 70-tave. Banorët tregojnë se në këtë spital punojne rreth 50 persona, nga të cilët staf administrativ, sanitare e infermierë, por vetëm dy mjeke pensioniste të cilat ndajnë turnet me njëra-tjetrën.
Situata është e tillë prej vitesh dhe askush nuk kujtohet të dergojë një mjek specialist. Por dërsa stafi mjekësor ekzistues përpiqet të bëjë më të mirën për shëndetin e banorëve të Delvines, duhet të perballen me kushtet skandaloze që ekzistojnë në këtë spital.
Përveç ambienteve të urgjencës, ku duket se është vënë dorë vitet e fundit, situata në pjesën tjetër të spitalit lë shumë për të dëshiruar. Në këto ditë të nxehta, mjekët i dëgjon që flasin me njëri-tjetrin për mungesën e ujit. Thërrasin një punonjës të shërbimeve mbeshtetëse por me kot, pasi ai i bën të ditur se ka probleme depozita.
Stafit mjekësor i duhet që në këtë kohë përvëluese, të bëjnë pa ujë dhe dhe duart ti fshijnë pas çdo vizite me letra të lagura. Nuk mjafton vetëm kaq, pasi pacientët duhet të udhëtojnë deri në Sarandë për të bërë një ekografi dhe radiografi, shërbimet më elementare që duhet të jepen dhe në një qendër shëndetësore.
“Aparatura e ekografisë ekziston, por mungon specialisti për të bërë ekon. Ndërkohë që aparatura e radiografisë ka 3.5 vite qe nuk punon”-tregon një banor që ka çuar një të afërmin e tij në këtë spital, që eksiston si godinë, por pa ofruar shërbimet e duhura. Qytetarët e Delvinës bëjnë përgjegjëse të gjitha qeverite dhe bashkitë të cilat nuk kanë bërë asgjë për këtë qytet.