Qëndroi 6 dite i fshehur 25 vjeçari qe tentoi të vriste me armë zjarri një 21 vjeçar pas nje sherri mes tyre. Ai u dorezua ne policia pas negocimit nga ana e familjes.
Ngjarja u shënua mbrëmjen e 5 gushtit, kur dy të rinjtë u konfliktuan verbalisht me njëri-tjetrin për arsye të rëndomta. Gjithçka ndodhi në rrugë, ku Rei Fama, 25 vjeç, u përfshi në konflikt me Kevi Bregun, 21 vjeç, për arsye banale.
I plagosuri Kevi Bregu
Konflikti i nisur nuk mbeti me aq. Rei Fama, pasi u largua, shkoi në makinë dhe mori një automatik, ndërsa pa u menduar gjatë shkoi përsëri për ta arritur 21-vjeçarin dhe qëlloi në drejtim të këtij të fundit.
Burime nga Policia thanë se mes të rinjve nuk kishte probleme të mëparshme dhe konflikti kishte lindur në çast, ndërsa autori është përshkruar si një person problematik dhe konfliktual.
Pasi qëlloi në drejtim të të riut, 25-vjeçari u largua dhe Policia e shpalli në kërkim pa mundur ta kapte. U deshën 6 ditë që i riu të vetëdorëzohej, ndërsa akuzohet për tentativë vrasjeje.
“Në ambientet e Komisariatit Devoll është vetëdorëzuar shtetasi R. F., 25 vjeç, banues në Bilisht. Ky shtetas ishte shpallur në kërkim për veprat penale ‘Vrasje me dashje, mbetur në tentativë’ dhe ‘Mbajtje pa leje dhe prodhimi i armëve e municionit’, sepse pas një konflikti të çastit me shtetasin K. B., 21 vjeç, ka tentuar ta vrasë me armë zjarri tip automatik këtë të fundit”, bëhet e ditur nga Policia.
Burime nga grupi hetimor thanë se mbrëmjen e 5 gushtit, Rei Fama qëlloi me disa plumba në drejtim të 21-vjeçarit Kevi Bregu, fatmirësisht pa mundur ta lëndonte atë dhe gëzhojat u gjetën në trotuar gjatë këqyrjes në vendin e ngjarjes.
Por, ndërsa Policia e shpalli në kërkim, 25-vjeçari arriti të fshihej për 6 ditë radhazi dhe Policia nuk arriti ta zbulonte vendndodhjen e tij. U desh edhe negocimi me familjarët dhe të afërmit e autorit që ai të vetëdorëzohej në Polici dhe të përballet me drejtësinë për akuzat që rëndojnë mbi të.
/PANORAMA
