Sekretari i Përgjithshëm i PD-së, Gazmend Bardhi, i ka drejtuar një pyetje Valdrin Pjetrit, i cili mori mandatin si kryebashkiak në votimet e 30 qershorit, se çfarë i kujton data 27 janar 2003.
Reagimi i Bardhit, erdhi pasi Pjetri më parë kishte publikuar disa certifikata sigurie që sipas provonin se ai nuk kishte probleme me ligjin në vendin fqinj.
Por në partinë më të madhe të opozitës janë të sigurtë se Pjetri është subjekt i ligjit të dekriminalizimit. Burime nga PD konfirmojnë se zotërojnë dosjen e plotë të kandidatit të Rilindjes për Bashkinë e Shkodrës, ndërsa data e përmendur nga Bardhi në formën e pyetjes drejtuar Pjetrit është pikërisht ajo kur ai është arrestuar në Firence të Italisë.
Për opozitën nuk ka asnjë dyshim se akuzat ndaj Pjetrit qëndrojnë, ndërsa i kërkojnë Prokurorisë së Përgjithshme që të reagojë shpejt lidhur me rastin.
Demokratët do të ndjekin të njëjtën strategji si në rastin e ish-deputetëve apo ish-kryebashkiakëve të Rilindjes që ishin subjekt i ligjit të dekriminalizimit, por që për muaj me rradhë u morën në mbrojtje nga Kryeministri Rama, i cili vazhdimisht mohonte akuzat.
Megjithëse në rastin e Pjetrit, Rama nuk ka reaguar publikisht, demokratët e akuzojnë atë se nuk po lejon organin e akuzës të veprojë dhe të bëjë verifikimet e duhura.
