Një udhëzim i firmosur nga kreu demokrat Lulzim Basha angazhon tërësisht anëtarët e Këshillit Kombëtar të PD-së që të jenë aktivë në vendimmarrjet apo kontrollin e funksionimit të degëve të kësaj partie.
Kështu çdo anëtar i Këshillit Kombëtar automatikisht është anëtar i kryesisë së degës së PD-së, atje ku banon, ose atje ku është i deleguar.
Gjithashtu anëtari i Këshillit Kombëtar automatikisht është përgjegjës për veprimtarinë politike që i caktohet nga Kryesia e degës, apo për të mbuluar zona brenda degës.
Vendimi në fjalë synon që të angazhojë tërësisht anëtarët e Këshillit Kombëtar të PD-së në strukturat e degëve.
Deri më sot, anëtarët e Këshillit Kombëtar, pavarësisht se është forumi më i lartë politik mes dy Kuvendeve të PD-së, nuk kanë pasur ndonjë peshë specifike në raport me organizimin e strukturave, kjo edhe për faktin se është konsideruar më tepër një forum jo shumë aktiv.
Duket se me vendimin e firmosur nga Basha, kreu demokrat po synon të vërë në lëvizje mbi 250 anëtarët e këtij forumi, një pjesë e të cilëve ose nuk janë të angazhuar ose kanë një angazhim minimal.
