Luigj Gjeloshi, 54 vjeç, është mbytur ujrat e lumit Mat, mbrëmjen e djeshme, teksa po tentonte të kalonte, pranë fshatit Skuraj.
Viktima kishte vetëm pak ditë që ishte kthyer pranë familjes së tij pasi ka qenë në emigracion. Zona ku ka ndodhur ngjarja ka qenë pa ndriçim, dhe ka qenë një patrullë e policisë që i ka bërë me shenjë 54-vjeçarit për të ndaluar, raporton Faxnews.
Duke qenë se e ka marrë me vonesë sinjalizimin, Gjeloshi ka kaluar urën me mjetin e tij dhe më pas është kthyer për të komunikuar me punonjësit e policisë në këmbë.
Në rrethana ende të paqarta ai ka rënë në ujë, ndërsa në makinë duke e pritur ishin bashkëshortja dhe vajza e tij e mitur, e cila mbrëmjen e djeshme kishte festuar dhe ditëlindjen.
Janë dashur disa orë për të bërë të mundur nxjerrjen e trupit nga uji, pasi errësira e madhe ka vështirësuar punën e punonjësve të zjarrfikëses.
Njoftimi i policisë:
Në aksin rrugor Milot – Rrëshen, në vendin e quajtur ” Ura e Skurajve”, dyshohet të ketë rrëshqitur aksidentalisht duke rënë poshtë në lumin Mat, shtetasi L.Gj. 54 vjeç, banues në Shënkoll në Lezhë dhe për pasojë ka ndërruar jetë.
Materialet procedurale iu referuan Prokurorisë pranë Gjykatës Shkallës Parë Kurbin për veprime mëtejshme.