Oficeri ndërlidhës ndërmjet Shqipërisë dhe Italisë për luftën kundër drogës, Massimo Gallora është i bindur se bandat shqiptare janë fuqizuar ndjeshëm.
Në një intervistë për emisionin “Narcotica” të transmetuar mbrëmjen e së Mërkurës në Rai 3, Gallora sjell një rast konkret, në arrestimin e një shtetasi shqiptar në Pulja të Italisë.
“Kemi rastin e një personi, po e quajmë Francesko, pasi emri i tij i vërtetë është ndryshe. Ai kishte për detyrë që të menaxhonte brigjet puljeze, ku mbërrinte droga e nisur nga Shqipëria”.
Sipas investigatorit italian, ky rast është një ndër dëshmitë e shumta se kriminaliteti shqiptar nuk është më në rolin e shërbyesit për mafian italiane. “Deri para disa kohësh, klanet shqiptare ishin në shërbim të grupeve mafioze italiane si Ndragheta e Sacra Corona Unita”.
Por, tashmë grupet shqiptare kanë siguruar territor në tregun e narkotikëve, aq sa “ne zbuluam se kishte edhe italianë në shërbim të këtij ‘Franceskos’” thotë Masimo Gallora./Boldnews.al
