Instituti Ndërkombëtar për Studime Ballkanik dhe të Lindjes së Mesme (IFIMES) me qendër në Ljubjana të Sllovenisë, ka analizuar situatën aktuale politike në Kosovë, përfshirë dorëheqjen e kryeministrit Ramush Haradinaj dhe marrjen në pyetje nga Dhoma e Posaçme për Kosovën dhe Prokuroria e Posaçme (KSC-SPO) në Hagë.
Një seksion i këtij shkrimi i është kushtuar edhe Presidentit të Kosovës, Hashim Thaçi, i cili në analizë cilësohet si simboli i oktapodit politiko-kriminal që mbështet nga regjimi i Ramës ‘i cili ka ngritur një perandori krimi në vend me rrënjë të thella ndërkombëtare dhe që shpesh përdor Kosovën si hapësirë për shtrirjen e tentakulave në rajon.’
‘Hashim Thaçi – simboli i oktapodit politiko-kriminal
Ndërsa Ramush Haradinaj mban pozitat operacionale më të forta në Kosovë si kryeministër i saj, Hashim Thaçi përfaqëson simbolin e një oktapodi politiko-kriminal. Pushteti i Thaçit është fuqizuar më shumë nga aleanca me kryeministrin e Shqipërisë Edi Rama dhe regjimin e tij, i cili ka ngritur një perandori krimi në vend me rrënjë të thella ndërkombëtare dhe që shpesh përdor Kosovën si hapësirë për shtrirjen e tentakulave në rajon.
Pushteti i Hashim Thaçit e klanit të tij karakterizohet nga nepotizmi, intimidimi i qytetarëve dhe kundërshtarëve politikë, presioni mbi median, shantazhet, krimi, mungesa e transparencës dhe korrupsioni në çdo sferë të shoqërisë së Kosovës. Një trend veçanërisht shqetësues është emigracioni masiv i brezit të ri dhe i popullsisë së aftë për punë. Krimi i organizuar dhe korrupsioni përbëjnë një kërcënim serioz për shoqërinë e Kosovës. Qeveria në detyrë e ka rënduar më tepër krizën dhe ka rritur pakënaqësinë e qytetarëve.
Sipas indeksit të korrupsionit më 2018 nga Transparency International, Kosova është në vendin e 93-të nga 180 vende të vëzhguara për korrupsion, duke mbajtur të njëjtin vend si Guajana, Gambia, Mongolia dhe Panamaja.
Sipas vlerësimit të bërë nga Reporterë pa Kufij për lirinë e medias, Kosova mban vendin e 75 nga 180 vende dhe iu përket vendeve me media pjesërisht të lirë.
Analistët kanë vlerësuar se pakënaqësia me qeverinë e Kosovës është e pranishme jo vetëm midis shqiptarëve por edhe te pakicat etnike, duke pasur parasysh që qeveria nuk ka bërë sa duhet për të luftuar krimin e organizuar e korrupsionin, për të përmirësuar standardin e jetesës dhe sigurinë, për të rritur punësimin, të tërheqë investimetë huaj, të përmirësojë respektimin e të drejtave themelore të njeriut e për të çliruar median, e cila ende kontrollohet nga qeveria, partitë dhe manjatët. Qeveria nuk e ka ndryshuar qasjen për të zhvilluar programe efektive punësimi, modifikuar politikën e investimeve ekonomike dhe për im[lementimin e sistemit të drejtësisë e shtetit ligjor, për të cilat aktualisht përdoren vetëm 1% e GDP.’
