Policia e Shtetit ka reaguar lidhur me shpërthimin e ndodhur mesnatën e së dielës në Kamëz, ku sipas PD-së, një sasi tritoli ishte vendosur në derën e banesës së nënkryetarit të Bashkisë së Kamzës, Vendim Demaj.
Por policia, në një reagim të saj, thotë se lënda plasëse nuk i është vendosur banesës së Demajt, por derës së banesës së marrë me qera nga shtetasi Paulin Gjegjaj.
Sipas policisë, shpërthimi ka ndodhur më 4 gusht te Kthesa e Kamzës, në pallatin ku jeton Demaj.
Njoftimi i Policisë:
Më datë 04.08.2019, rreth orës 23.30, tek kthesa Kamzës në katin e tretë të një pallati, në pjesën e derës së banesës së marrë me qera nga shtetasi P.Gj, ka shpërthyer një sasi e vogël lënde e dyshuar plasëse, ku në momentin e shpërthimit brenda në banesë nuk ka pasur njeri dhe si pasoje ka vetëm dëme materiale.
Grupi hetimor po vijon punën për zbardhjen e rrethaneve të ngjarjes, identifikimin dhe kapjen e autorit.
Metarialet i kanë kaluar Prokurorisë së Rrethit Gjyqësor Tiranë për veprime të mëtejshme, për veprën penale “Shkatërrimi i pronës me eksploziv”
Më herët përmes një deklarate, PD theksonte se “dënon me ashpërsi rritjen e dhunës kundër kundërshtarëve politkë dhe përfaqësuesve të opozitës. Mbrëmë në mesnatë është vendosur tritol në banesën e nënkryetarit të Bashkisë së Kamzës, Vendim Demaj. Fatmirësisht, ai dhe familja e tij nuk ndodheshin në banesë”.
“Policia e Shtetit po e fsheh këtë ngjarje të rëndë dhe deri tani nuk ka asnjë të dhënë për agresorët.
Bashkia e Kamzës prej kohësh është vënë nën sulmin verbal të kryeministrit Rama dhe disa strukturave të tjera të pushtetit. Por vendosja e tritolit në banesën e nënkryetarit të Bashkisë së Kamzës përbën një përshkallëzim të agresionit ndaj kundërshtarëve politikë të regjimit të Edi Ramës”, thuhej në reagimin e PD.
