Kryeministri Edi Rama nuk heq dorë nga projekti i arkitektit danez, Bjarke Ingels dhe studios së tij “BIG” për Teatrin e ri Kombëtar.
Në kulmin e debatit dhe qëndresës së artistëve, aktorëve, shoqërisë civile dhe qytetarëve të grupuar në atë që sot njihet si “Aleanca për Mbrojtjen e Teatrit”, dhe opozitës në anën tjetër që është rreshtuar në krah të Aleancës, Rama ka publikuar në rrjet edhe njëherë qëndrimin e tij për Teatrin.
“Ja kështu, njësoj, do të shkëlqejë nesër edhe Teatri i ri Kombëtar, i cili përveçse do të jetë një gëzim nga brenda për çdo artist e artdashës, do të rrezatojë edhe nga jashtë, si një kryevepër e arkitekturës bashkëkohore, falë talentit të arkitektit të famshëm danez Bjarke Ingels e të studios së tij prestigjoze “BIG””, shkruan Rama, në një koment që e nis me rikonstruksionin e Teatrit të Operas dhe baletit dhe ndryshimeve që po ndodhin në mjediset e brendshme të kësaj godine.
Ndoshta me dashje dhe për të treguar se i shkon gjërave deri në fund, Rama ka treguar se në zbatim, pavarësisht vonesave dhe çeljes së procedurave nga Bashkia e Tiranës, projekti i përzgjedhur është ai i arkitektit danez.
Projekti në fjalë është paraqitur në mars të 2018, më pas ishte Qeveria që paraqiti një ligj special në Kuvend që favorizonte kompaninë Fusha për zbatimin e projektit dhe ndërtimin e disa kullave pas Teatrit.
Ky ligj, më vonë u kritikua nga Bashkimi Evropian si shkelje e Marrëveshjes së Stabilizim-Asociimit (MSA). Qeveria, nga ana e saj, u përgjigj se nuk kishte buxhet të mjaftueshëm për të ndërtuar një teatër të ri.
Pas debateve dhe përplasjeve lidhur me Teatrin dhe projektin e paraqitur, u raportua se arkitekti danez do të tërhiqej.
Por pavarësisht asaj çka raportohet jozyrtarisht, Kryeministri Rama në një nga postimet e fundit konfirmon të njëjtin projekt, atë të studios së arkitektit Bjarke Ingels.
Ndaj këtij të fundit, kreu i PD-së, Lulzim Basha, ka paralajmëruar një padi penale.
“Për Bjarke Ingels po përgatitet një padi penale. Po përgatitet gjithçka dhe në prokurorinë belge. Dhe mbi çdo blerësi që po merr pjesë në këtë krim monstruoz.
Bjarke Ingels është një bashkëpunëtor në grabitjen e tokës nga narkomafia e udhëhequr nga kryeministri Edi Rama, ndaj paralajmërohet: do të trajtohesh si non-grata nga komuniteti i artistëve dhe populli i Tiranës”, deklaronte Basha.
Ndërkohë rreth 1 javë më parë, Ambasadori i BE-së, në Tiranë, Luigi Soreca, ka vënë theksin te respektimi i procedurave nga ana e qeverisë, ndërsa ka kërkuar transparencë në lidhje me tenderin.
“Nuk duhet të jemi ne ata që themi nëse duhet të ketë një ndërtesë të re ose jo, këtë e kanë përgjegjësi autoritetet shqiptare. Ashtu sikur e dini edhe ju pozicioni ynë ka qenë i qartë që nga shtatori i vitit të shkuar, BE i ka bërë thirrje qeverisë që të jenë transparent edhe pa qasje diskriminuese në treg. Ky duhet të jetë parimi që duhet të udhëheqë autoritetet shqiptare, prandaj është lancuar edhe tenderi për më tej.
Mendoj se është shumë e rëndësishme që të ketë kritere të qarta edhe transparente, edhe të ketë një qasje të drejtë per këtë cështje. Ajo që është e rëndësishme për ne është sundimi i ligjit, procedurat e tenderit duhet të jenë në përputhje me ato të BE-së, mesa di tenderi është i hapur deri në 19 shtator. E rëndësishme është edhe konkurrenca e lirë dhe e drejtë”, deklaronte Soreca.
Por pas asaj që vetë Rama ka postuar në rrjet, duket se edhe formalisht ai nuk ka dëgjuar këshillën e diplomatit të BE-së, që herë pas here shfaqet në krah të Kryeministrit. /BN/
