Isa Mustafa u zgjodh kryetar i LDK-së për herën e tretë radhazi, pavarësisht kundërshtive nga disa zyrtarë të kësaj partie. Kontestimet kryesore erdhën nga Fatmir Sejdiu dhe Vjosa Osmani, të cilën e cilësuan jodemokratik Kuvendin Zgjedhor të LDK.
Me zgjedhjen e Isa Mustafës kryetar të LDK-së, nuk është pajtuar as Shpejtim Bulliqi, i cili sapo ka dhënë dorëheqje nga të gjitha funksionet në LDK.
Ai ka shkruar se në krye të LDK-së është zgjedhur një klikë komuniste, që për të është e papranueshme.
Bulliqi thotë se këtë vendim po e merr pas 30 viteve angazhim në këtë parti.
Ndërkohë, Mustafa në fjalën e tij tha se LDK nuk bën koalicion me PDK-në.
“Këtë pyetje as mos e bëni”, ka thënë Mustafa, në konferencën e parë si kryetari i sapozgjedhur i LDK’së.
Mustafa ka thënë se s’ka marrëveshje të brendshme për kandidatin për Kryeministër nga LDK-ja. Sipas tij, kandidati për Kryeministër do të jetë ai që ka përkrahjen më të madhe dhe që e përfaqëson vullnetin e qytetarëve.
Mustafa ka thënë se shpejt do të shpërndahet edhe Parlamenti i Kosovës. Ai shtoi se Avdullah Hoti ka marrë iniciativë për të shpërndarë Parlamentin.
