Nga Boldnews.al
Komisioni i Pavarur i Kualifikimit ka marrë pushimet vjetore, duke bllokuar përkohësisht shqyrtimin e kandidaturave për Prokurorisë Speciale, SPAK.
Ligji parashikon që struktura SPAK të nisë punën me 15 prokurorë, të cilët duhet të kenë kaluar Vetingun me vendim të formës së prerë.
Situata me kandidatët
Por, deri më tani, kanë kaluar në fazën e parë të Vetingut 10 nga 15 kandidatët, një pjesë e të cilëve ende me një vendim të formës së prerë. Për 5 kandidatët që i mungojnë apelit, Komisioni i Pavarur i Kualifikimit, shkalla e parë e Vetingut, duket se i ka planifikuar seancat për në muajin Shtator.
Në një shënim në faqen zyrtare të internetit të KPK thuhet se “Për momentin nuk është regjistruar akoma asnjë seancë dëgjimore për këtë muaj”, duke lënë të kuptohet se muaji Gusht do të jetë pushim për institucionin.
Nga kandidatët e SPAK-ut, presin të dalin në Veting 5 prej tyre- Anton Martini, Elisabeta Imeraj, Doloreza Musabelliu, Ndini Tavani dhe Anita Jella.
Ndërkohë, që, deri në momentin e publikimit të këtij shkrimi, ende nuk janë konfirmuar me vendim të formës së prerë 6 kandidatë- Altin Dumani, Manjola Kajana, Klodian Braho, Edvin Kondili, Behar Dibra dhe Elida Kackini.
Nga 15 kandidatët për SPAK, vetëm 3 janë konfirmuar, deri më tani, me vendim të formës së prerë- Arben Kraja, Enkelejda Millonai dhe Ened Nakuçi.
Kandidati i fundit, Besnik Muçi, pret shqyrtimin e rastit të tij në Kolegjin e Posaçëm të Apelimit, proces i cili nis në fillim të muajit Shtator.
Vonesat
Strukturat e Vetingut janë institucione administrative, zyrtarët e të cilit, si në çdo agjenci tjetër, përfitojnë lejen vjetore, pas një viti të ngarkuar me punë.
Por, KPK ka një veçanti në funksionimin e tij. Aktiviteti dhe, sidomos, rezultati i tij, kanë një interes thelbësor kombëtar, si për opinionin publik shqiptar, ashtu edhe për partnerët ndërkombëtarë që janë investuar në miratimin dhe zbatimin e Reformës në Drejtësi në Shqipëri.
Të gjithë të interesuarit për zbatimin e Reformës në Drejtësi, e sidomos për luftën kundër korrupsionit në nivele të larta, janë në pritje të krijimit të SPAK-ut. Por kjo pritje duhet të vijojë ende, pasi komisionerët e Vetingut kanë vendosur të pezullojnë procedurat, deri në përfundim të pushimeve vjetore.
Tre vjet pas ndryshimeve kushtetuese dhe miratimit të paketës së plotë ligjore shoqëruese, institucionet nuk kanë arritur të krijojnë strukturën më të rëndësishme të Reformës në Drejtësi, SPAK, ndërkohë që janë shkatërruar ato ekzistuese-Gjykata Kushtetuese dhe Gjykata e Lartë.
Situata e krijuar në sistemin e drejtësisë, sidomos vonesat e pajustifikuara për ngritjen e SPAK-ut, kanë zbehur pritshmëritë e opinionit publik, si edhe kanë nxitur thirrjet e njëpasnjëshme, në ndonjë rast edhe me ton dëshpërues, të partnerëve ndërkombëtarë drejtuar qeverisë shqiptare.
Zëvendësndihmës Sekretar i Shtetit për Çështjet e Evropës dhe Euroazisë, Matthew Palmer, tha në një intervistë për “Zërin e Amerikës” të Enjten se “Mendojmë se është shumë e rëndësishme që çdo sistem të ketë kontrollet dhe ekuilibrat e duhur, në mënyrë të ketë përgjegjshmëri, transparencë dhe respekt për sundimin e ligjit. Ne ia kemi shtruar këto çështje Kryeministrit Rama, siç kemi bërë me paraardhësin e tij dhe si ç’do të bëjmë edhe me pasardhësin e tij. Kjo është shumë e rëndësishme për Shtetet e Bashkuara, është e rëndësishme për Shqipërinë dhe për popullin shqiptar”.
