Gjykata e Tiranës i ka çertifikuar mandatin e kryebashkiakut të Kamzës, ish-deputetit socialist Rakip Suli, i cili shpallet fitues nga votimet e 30 qershorit.
Suli, sipas KQZ-së, do të drejtojë një nga bashkitë më të mëdha në vend, duke pasur në votime vetëm 9 % të votuesve, shifër minimale kjo për një kryebashkiak.
Por gjithsesi, pas vendimit të gjykatës së Tiranës, në Bashkinë e Kamzës pritet konstituimi i Këshillit Bashkiak, betimi i Sulit dhe më pas marrja zyrtarisht e detyrës dhe e zyrës së kryebashkiakut.
Deri më tani kryebashkiakët e Rilindjes, dalë nga votimet e 30 qershorit, kanë marrë zyrat në Devoll dhe Kavajë, ku ka pasur protesta, por në fund ata kanë hyrë në institucionet vendore.
Por, Xhelal Mziu, që ka drejtuar bashkinë e Kamzës prej vitit 2007, ka paralajmëruar se nuk do të dorëzojë zyrën. Nuk dihet nëse Mziu do të mundet deri në fund t’i qëndrojë këtij vendimi, pasi deklarata të tilla kishin bërë më parë edhe Bledjon Nallbati në Devoll dhe Isa Sakja në Kavajë.
Gjithsesi do të shihet nëse edhe në Bashkinë e Kamzës, socialistët do të veprojnë me skenarin e aplikuar në Devoll dhe Kavajë.
Në të dy bashkitë e drejtuara nga opozita, kryebashkiakët e Rilindjes janë betuar në ambientet e Prefekturës dhe në orët e pasdites kanë shkuar në institucionet e bashkisë, duke hapur dyert forcërisht, kanë ndryshuar bravat, ndërsa Policia e Shtetit ka marrë në mbrojtje këto institucione lokale.
