Gjykata e Apelit ka pushuar hetimet ndaj Kastriot Gjuzit, i dyshuar për vrasjen e Mario Majollarit. Në këtë mënyrë Apeli ka lënë në fuqi vendimin e marrë pak kohë më parë, kur u pushuan hetimet ndaj të dyshuarit të ngjarjes që tronditi kryeqytetin.
28-vjeçari Marjo Majollari u qëllua me 3 plumba pranë banesës së tij, ndërsa policia deklaronte pak kohë pas krimit se kishte zbuluar autorin. Për këtë policia arrestoi Kastriot Gjuzin, ndërsa krimin e klasifikoi si hakmarrje.
Majollari ishte deportuar nga Suedia ku kishte shkuar për të kërkuar azil, madje duke deklaruar se i rrezikohej jeta në Shqipëri. Por autoritetet suedeze nuk ia kishin aprovuar kërkesën dhe ai ishte kthyer në Tiranë, ku edhe u ekzekutua.
Më 28 maj të 2019, Gjykata e Tiranës pranoi kërkesën e prokurorisë dhe vendosi të pushojë hetimet për Kastriot Gjuzin të akuzuar për vrasjen e Mario Majollarit, rreth një vit më parë.
Prokuroria e Tiranës kishte kërkuar pushimin e procedimit, pasi nuk ka prova të mjaftueshme për të vërtetuar fajësinë e Gjuzit.
Në kërkesën e saj organi i akuzës thotë se nuk mund ta provojmë fajësinë e të dyshuarit pasi nuk ka asnjë provë që e implikon atë në krim përveç pamjeve filmike, ku ai ishte në vendin e ngjarjes kur u ekzekutua 29-vjeçari.
Prokurori ka argumentuar në seancë se nuk janë gjetur provat materiale, si arma e krimit dhe për këtë nuk vërtetohen pretendimet.
Ndërkohë, nëna e Majollarit duke folur për mediat, është shprehur e revoltuar dhe thotë se do të apelojë vendimin.
“Shteti i doli për zot djalit tim dhe e ktheu, prisja më shumë. Nuk kam marr avokat por do ta ankimoj çështjen. Ky ishte shteti që ma ktheu, që i doli për zot që ka sigurinë, është ky shtet që ma vrau dhe po mbron kriminelin.
Jam thirrur vetëm njëherë nga Prokuroria dhe jam thirrur për herë të dytë kur m’u dha dosja, nuk kam mundur ta lexoja të gjithën por i pyeta se çfarë përmblidhte. Më thanë që është sekuestruar arma. Djalin e kam pasur flori, shihte punën e vete, hallin e vet, i vetmi faji ishte që kishte atë mbiemër dhe atë gjak. Ka qenë punëtor. Ku është drejtësia, ku është shteti që ka bërë Edi Rama? Shteti ma ktheu djalin dhe tha nuk i rrezikohet jeta, ndërsa tani po shteti liron kriminelin”, është shprehur e ëma e viktimës.
Kastriot Gjuzi u identifikua nga policia si autorë i krimit 24 orë pas ngjarjes dhe më pas ai u arrestua në Kosovë nëntë ditë më pas. Ai dyshohej se ekzekutoi 28-vjeçarin për motive gjakmarrje, pasi babai i Mario Majollarit i kishte vrarë vëllain Ilir Gjuzi në vitin 2000.
Mario Majollari u ekzekutua me katër plumba mbrëmjen e 10 prillit të një viti më parë, në rrugicën e shtëpisë së tij, vetëm 5 ditë pasi ishte kthyer nga Suedia ku i ishte refuzuar azili.
