Ka zgjatur më shumë se një vit arratia e vëllezërve Kaca në Dibër, prangosen gjatë festës për lirimin e shokut nga burgu.
Kalosh dhe Artur Kaca ishin shpallur në kërkim për një plagosje të ndodhur në prill të 2018, ku mori pjesë dhe vëllai i tyre i vogël, Rruzhdi Kaca, i arrestuar ditën e ngjarjes. Prej atëherë, dy vëllezërit Kaca i fshiheshin Policisë lokale.
Madje, në fshat kishin përhapur lajmin se ndodheshin jashtë vendit. Por gjatë mesnatës së kaluar (rreth orës 23:25) u arrestuan, ndërsa ndodheshin në një banesë të fshatit të tyre Tartaj. Forcat e Policisë Dibër rrethuan shtëpinë ku ndodheshin dy vëllezërit, duke i vënë në pranga. Në momentin e arrestimit, vëllezërit Kaca nuk kanë bërë rezistencë.
Ata po festonin daljen nga burgu të një miku të tyre dhe nuk e prisnin se tashmë do të ishin ata që do të hynin në burg.
“Arrestimi i tyre u bë, pasi më datë 06.04.2018, në bashkëpunim me njëritjetrin dhe me vëllanë tjetër, shtetasin Rr.K, (i arrestuar ditën e ngjarjes nga Policia), në fshatin Nezhaj, Dibër, kanë plagosur me armë zjarri në oborrin e banesës së tij shtetasin E.Ç, 24 vjeç, për motive hakmarrjeje”, thuhet nga Policia, ndërkohë që ndaj vëllezërve janë ngritur akuzat “Vrasja me paramendim mbetur në tentativë”, kryer në bashkëpunim dhe “Mbajtja pa leje e armëve luftarake”. Në prill të 2018-ës, tre vëllezërit sulmuan me armë familjen Çera në fshatin Tartaj.
Sulmi i papritur dhe i armatosur shkaktoi plagosjen e 24-vjeçarit Erjon Çera. Breshëritë e automatikut i shkaktuan të riut plagë të rënda në këmbë. Ai u dërgua në spitalin e Peshkopisë dhe pas ndërhyrjes së mjekëve shpëtoi. Njëri nga agresorët u arrestua pak orë pas krimit të ndodhur, madje tentoi të merrte autorësinë e ngjarjes, por pas hetimeve rezultoi se edhe dy vëllezërit e tjerë, Kalosh e Artur Kaca, 36 dhe 28 vjeç, kishin lidhje me ngjarjen e rëndë. Vëllezërit Kaca plagosën me breshëri automatiku Erjon Çerën, si hakmarrje për dhunën e ushtruar ndaj vëllait të tyre të vogël, Rruzhdiut.
Familja Kaca dhe Çera ishin përfshirë në konflikt për disa kullota në periferi të fshatit. Secila pretendonte pronësinë mbi livadhet, ndërsa banorët e tjerë shprehen se ato ishin tokë shtetërore dhe shfrytëzoheshin nga i gjithë fshati malor. Artur Kaca dhe Erjon Çera, mbrëmjen e 6 prillit 2018 kanë debatuar me tone të forta mes tyre. Mësohet se dy të rinjtë janë konfliktuar edhe fizikisht. Kaca ka pretenduar se Çera e ka goditur në befasi dhe për këtë do të hakmerrej. /Panorama/
Plagosën për hakmarrje 24-vjeçarin, arrestohen dy vëllezërit dibranë on Vidnews.
