Komisioni i Pavarur i Kualifikimit konfirmoi në detyrë prokurorin e Apelit për Krime të Rënda, Altin Dumani, një prej emrave më të përfolur për të marrë drejtimin e Strukturës së Posaçme Anti-korrupsion, SPAK.
Dumani u përball me një seancë dëgjimore pa probleme para trupës së Vetingut, pak ditë më parë. Komisioni i Pavarur i Kualifikimit kreu verifikimet për Dumanin në tre kriteret-atë të pasurisë, integritetit dhe aftësive profesionale.
Sipas trupës së Vetingut, Dumani mori dritën jeshile në të tre komponentët, duke u konfirmuar në detyrë.
Altin Dumani, i caktuar përkohësisht si drejtues i Prokurorisë së Apelit për Krime të Rënda, është emri i parë në listën e kandidatëve për SPAK, të hartuar javën e kaluar nga Këshilli i Lartë i Prokurorisë (KLP).
