Gëzim Sadikaj dhe Lutfi Kastrati janë dy banorët e Astirit që u vetëdorëzuan në polici, pas akuzave mbi tubimet e organizuara në këtë zonë për mbrojtjen e banesave dhe bizneseve të tyre, që rrezikohen të shemben nga një plan i Bashkisë së Tiranës, për zgjerimin e rrugës.
Ndaj dy banorëve është dhënë masa ‘detyrim paraqitje’ por që sipas tyre kjo bëhet për të ushtruar presion.
“Ne u thirrëm me akuzën e “kundërshtimit të forcave të rendit’. Kjo nuk është hera e parë, pasi ka 9 muaj që na trajtojnë si kriminelë. Ne kemi qenë shumë paqësor në të gjithë protesta, kemi dalë të mbrojmë shtëpitë dhe pronat tona..
“Nuk kanë asnjë fakt që unë të kem përdorur dhunë. Unë po nuk pat drejtësi do të bëj vetëgjyqësi, e di kush e ka dhënë atë urdhër dhe kush e ka përdorur. 2 milion e 600 mijë euro janë futur në xhepin e një kompanie fantazëm në kurriz të banorëve të Unazës së Re”, tha Kastrati.
Ndrkohë banori tjetër, Gëzim Sadikaj tha se këto ndalime që janë bërë të përditshme.
“Për mua nuk ka tërheqje, vetëm ka inkurajim më të madh. Gjykatës, prokurorë, policë, sapo e marrin vesh se jemi banorë të Astirit rrijnë me kokën ulur sepse e dinë se me ne po bëhet padrejtësi.
Saimir Tahiri lirohet dhe ortaku i tij dënohet me 15 vjet burg, a e kuptoni se çfarë bëhet, kriminelët bredhin të lirë dhe arrestohen banorët që mbrojnë pronat e tyre.
Ne presim drejtësi, po nuk ka do të bëjmë vetëgjyqësi. Nga protesta jonë e ligjshme nuk do të tërhiqemi kurrë, ata mund të arrestojnë Gëzimin por kurrë shpirtin”, tha ai.
