Lulzim Basha, kryetar i PD-së, në funksion të marrëveshjes së nënshkruar të enjten me Aleancën për Mbrojtjen e Teatrit, ka angazhuar anëtarët e forumeve më të larta drejtuese të kësaj partie, në mbrojtje të godinës.
Në ditët e fundit ka pasur përplasje dhe tensione mes artistëve e aktorëve, shoqërisë civile dhe qytetarëve, me forcat e policisë që tentuan të marrin nën kontroll godinën e Teatrit Kombëtar, e cila prej muajsh po mbrohet nga Aleanca për Mbrojtjen e Teatrit nga një projekt i qeverisë Rama dhe kryebashkiakut Erjon Veliaj, që synon shembjen e godinës ekzistuese dhe ndërtimin e një kompleksi kullash dhe një teatri të ri në këtë zonë.
Ish-deputetë dhe funksionarë të lartë të PD-së, përmes një grafiku të miratuar nga kreu demokrat, do të angazhohen për të mbrojtur Teatrin dhe për organizimin e protestave dhe qëndresës, nëse do të ketë një tjetër tentativë nga qeveria për të marrë nën kontroll godinën.
Referuar grafikut, në ditët në vijim prej mesnatës dhe në orët në vazhdim, me një mbulim 24 orësh, ish-deputetët dhe anëtarët e forumeve drejtuese të PD dhe FRPD do të jenë të angazhuar te Teatri Kombëtar në krah të artistëve, aktorëve dhe shoqërisë civile.
Tabela e mëposhtme tregon mënyrën se si janë organizuar ish-deputetët dhe funksionarët e PD, në mbështetje të të cilëve do të jenë edhe të rinjtë demokratë, apo përfaqësues të partive aleate.
