Policia holandeze po heton lidhur me trupin e pajetë të gjetur në kanalin Amsterdam-Rhine, për të cilin dyshohet se i përket Presidentit të vetëshpallur të Republikës së Çamërisë, Festim Lato.
Dyshimet janë se Lato është qëlluar me armë zjarri dhe trupi i pajetë i përket atij, ndonëse pritet konfirmimi nga analizat e ADN.
Vëllai i Festimit, Xhemil Lato, shprehet se 3 fëmijët nuk janë lejuar që të bëjnë identifikimin në morg të trupit të pajetë, pra nëse i përket ose jo babait të tyre.
Duket se kjo është arsyeja që familjarët e Festim Latos nuk kanë vendosur njoftimin e nekrologjisë në banesën ku jetojnë në Vlorë, ndërsa janë në pritje të përgjigjeve zyrtare nga autoritetet holandeze.
Lato rezulton i zhdukur prej disa ditësh. Njoftimi për vdekjen e tij u dha nga bashkëpunëtorë të Latos, i cili prej 25 vitesh jetonte në Holandë dhe njihej si një biznesmen.
Mediat në këtë shtet e lidhin vrasjen e tij me shpalljen e falimentit, pasi kishte shumë borxhe. Lato merrej me tregtinë e naftës, ndërsa kohët e fundit ishte vendosur në një shtëpi në Afferden. Jashtë banesës së tij valëviteshin flamujt e Holandës, SHBA-ve dhe flamuri i Shqipërisë, me shkrimin ‘Çamëria’.
Një mik i 43- vjeçarit, duke folur për mediat lokale, ka treguar se kohët e fundit Festimi nuk kishte shprehur asnjë shqetësim dhe çdo gjë dukej mirë. Kohët e fundit, Lato mësohet se kishte probleme me biznesin e tij, sepse kishte borxhe në kompani dhe individë të ndryshëm në zonën ku ai jetonte në Holandë. Shuma e borxheve të tij dyshohet se arrin në miliona euro.
Nga dyshimet e para thuhet se Lato është telefonuar nga një person joshqiptar. Pasi kanë lënë vendtakimin, 43- vjeçari është qëlluar për vdekje.
Lato e kishte shpallur veten dhe president të Çamërisë dhe prej vitesh luftonte për pavarësinë e territorit që sot është brenda kufirit të Greqisë.
“Vrasja e Festim Latos”/ Policia holandeze shton misterin: Viktima mund të jetë …
