Aleanca për Mbrojtjen e Teatrit kërkon mbështetjen e Sekretarit të Përgjithshëm të OSBE-së, Thomas Greminger, i cili do të zhvillojë sot një vizitë në Tiranë, për të diskutuar me aktorët politikë në vend mbi zgjidhjen e krizës politike.
Aleanca i kërkon Greminger një takim për të diskutuar mbi çështjen e Teatrit Kombëta, për të cilin qeveria shprehet e vendosur për t’a shembur dhe ndërtimin e një godine të re, në kuadër të një projekti me kulla, që do të rrethojnë zonën pranë Teatrit.
“Ne, Aleanca për Mbrojtjen e Teatrit, një grup artistësh dhe qytetarë të cilët kanë ardhur së bashku për të mbrojtur ndërtesën e Teatrit Kombëtar në Tiranë, me mirësi kërkojmë dhe do të jemi të nderuar, të kemi një takim me delegacionin tuaj gjatë vizitës tuaj këtu.
Ndërsa publikut të jashtëm çështja e Teatrit Kombëtar mund të duket si vendore, ne mund t’ju garantojmë se është në të vërtetë mishërimi më konkret i një krize politike shqiptare.
Shpronësimi i tokave publike dhe private që rrethojnë Teatrin Kombëtar është bërë i mundur nga një i ashtuquajtur “ligj i veçantë”. Ky i fundit nuk është asgjë më tepër se vjedhja e legalizuar, e bërë e mundur vetëm për shkak të faktit se Shqipëria nuk ka Gjykatën Kushtetuese funksionale për pothuajse dy vjet.
Mungesa e një Gjykate Kushtetuese, një nënprodukt i një të ashtuquajturës “reformë e drejtësisë”, i ka lejuar qeverisë të uzurpojë çdo pushtet vendimmarrës në Shqipëri.
Komunitetit ndërkombëtar i ka kushtuar shuma të mëdha të burimeve monetare dhe njerëzore për të ndërtuar një demokraci funksionale, sundim të ligjit, ndarje të pushteteve dhe kontrolleve dhe balancave në Shqipëri.
Asnjë nga këto nuk ekziston në këtë moment dhe ekzekutivi, i kontrolluar personalisht nga kryeministri Rama, është tërësisht i pakontrolluar siç tregon çështja e Teatrit Kombëtar. Ne besojmë se do të ishte një gabim i rëndë, i cili do të pengonte besimin e publikut shqiptar ndaj institucioneve ndërkombëtare, nëse një shtet i tillë lejohet të vazhdojë”, thuhet ndër të tjera në kërkesën që Aleanca i drejton zyrtarit të lartë të OSBE.
