Presidenti Ilir Meta në javët e fundit është shfaqur si mbrojtësi më i flaktë i Kushtetutës. Meta ka deklaruar se nëse do të zbatohej Kushtetuta sot do të kishim të plotësuar Gjykatën Kushtetuese dhe atë të Lartë, ndërsa përgjegjëse për situatën aktuale ka bërë atë që e quan si Ramaforma.
“Reforma në drejtësi është në këtë Kushtetutë, ndërsa ajo që po zbatohet është Ramaformë”, është shprehur Meta.
Deklaratat e Metës që hera herës shfaqet në media me Kushtetutën, që e tregon dhe i referohet, kanë shkaktuar edhe reagime me humor.
Së fundmi në rrjet është postuar një foto-montazh e Kreut të Shtetit, dikur shtangist, i cili ngre një shtangë, në anë të së cilës ndodhet Kushtetuta. Në sfond duket Mali i Tomorrit, që shpeshherë vizitohet nga Presidenti.
Piktori Avni Delvina ka publikuar në “Facebook” një grafikë të tijën, ku shihet presidenti Ilir Meta në rolin e një peshëngritësi, ndërsa shkruan se është nxitur nga veprimet e fundit të kreut të Shtetit, deri te mbrojtja e Teatrit me vajtjen e tij në Gjykaten Kushtetuese.
