Protesta e artistëve vijoi edhe përgjatë kësaj të enjteje, me personalitete që shpalosën argumentet e tyre nga foltorja e krijuar rishtazi pranë Teatrit Kombëtar, kundër shembjes së TK-së. Aktori Neritan Licaj u shpreh se ka informacione nga njerëz pranë Ramës që kreu i qeverisë nuk është tërhequr nga nisma për shembjen e Teatrit Kombëtar, por po ndjek një strategji.
“Kemi sinjalizme nga ‘brenda’ se burri me çitjane është bërë si gjeneral që s’ka më njerëz. Nuk është se ka hequr dorë nga qëllimi por, do të na lodhi dhe të na kafshojë natën”, zbuloi Licaj, i cili ftoi qytetarët tu bashkohen protestës kundër shembjes së Teatrit Kombëtar, siç e parashikon ligji i miratuar në Kuvend nga mazhoranca. Kryeministri Edi Rama, edhe këtë të enjte, një ditë pas rrethimit që policia i bëri godinës së teatrit, tregoi se nuk është tërhequr. Përmes një statusi në Facebook, u shpreh për shembjen e Teatrit Kombëtar.
Gjatë fjalës së tij, Licaj tha gjithashtu se sjellja e kryeministrit karshi artistëve dhe Teatrit Kombëtar tregon Rama ka një qasje diktatoriale.
Aktori u ndal edhe te marrëveshja që opozita nënshkroi sot me Aleancën për Mbrojtjes e Teatrit. Licaj e vlerësoi nismën e opozitës dhe paralajmëroi se nëse nuk i përmbahet kontratës, artistët do të protestojnë sërish. /BN/
