Teatri duhet të jetë varreza e njerëzve arrogantë, të dhunshëm, që i bëjnë keq njerëzve të Shqipërisë. I bëj thirrje të rinjve, çdo shqiptari, që të ngrihet dhe të mbrojë Teatrin Kombëtar.
Kështu u shpreh regjisori dhe aktori i njohur Edmond Budina, ndërsa i ka bërë thirrje kolegëve të tij, për t’u bashkuar, për të mos u shitur për një copë bukë.
“Ejani të ngrihemi sëbashku për të mbrojtur lirinë dhe demokracinë. Ne do të rezistojmë, ne nuk do të lejojmë të shembet ky teatër, ne duam të rikonstruktohet kjo godinë. Do mbrojmë demokracinë dhe kulturën”, tha Budina.
Ai i ka drejtuar një thirrje të fortë Edi Ramës dhe Sandër Lleshaj që të ndalojnë presionet dhe aktet e dhunës ndaj qytetarëve që mbrojnë Teatrin, duke kujtuar se situata të tilla nuk kanë ndodhur as në kohën e Ramiz Alisë.
Ndërsa aktorja Adriana Tolka, tha se edhe ata njerëz që janë sot te Teatri Kombëtar, që po lëvizin orenditë janë të shantazhuar.
“Çfarë po u bëni këtyre njerëzve, poi shantazhoni me bukën e gojës? Nuk kanë guxim të na shohin as në sy”, tha aktorja.
Gentian Zeneli i ka bërë thirrje artistëve t’i bashkohen qëndresës për të mbrojtur Teatrin Kombëtar.
“Teatri Kombëtar nuk është i imi, ndaj ejani t’a mbrojmë fort këtë institucion. Është një lëvizje thellësisht qytetare, duhet të mbrojmë Teatrin Kombëtar si symbol të kulturës shqiptare”, tha Zeneli.
